Atezainek ez dute golik sartzen normalean, salbuespenak salbuespen. Baina Jose Angel Iribarrek sartu zuen bat. Oso garrantzitsua, gainera. Eskuarekin izan zen, baina epaileek ezin zuten baliorik gabe utzi. Gol haren indarra ez zegoen geratzerik. Zerbait badaki Iribarrek baloiak galditzeaz, eta baloi hura gol izan zedin, bazekien zer egin behar zuen.

Atotxan gertatu zen. Donostian. Realaren zelaian. 1976ko abenduaren 5ean. Euskal Herriko futbolaren festa izan ohi den derbia zuten jokoan Realak eta Athleticek. Inork ez zuen galdu egun hartan. Biek irabazi zuten. Herri osoak irabazi zuen. Iribarrek berak eta Inaxio Kortabarriak sartutako gol handia algaraz eta pozez ospatu zen harmailetan, Euskal Herri osoko harmailetan. Bi taldeek batera irten zuten soropilera. Bi kapitainak buru. Zarauzko atezain mitikoa eta Arrasateko erdiko atzelari sendoa. Ikurrina eskuan zeukaten, Frankismoa erabat amaitu gabeari gola sartzeko. Legeztatu gabe zegoen oraindik ikurrina, eta legezkoa behar zuela egin zuten aldarri bi kapitainek.

Ezustea izan zen han bildutakoentzat. Arnasa. Txalo zaparrada entzun zen. Lehendik ere entzunak zeuzkan askotan Iribarrek. Ordurako 14 urte zeramatzan Athleticeko atezain. 1962an fitxatu zuen Baskoniatik, milioi bat pezetaren truke. Atotxakoaz geroztik, beste lau urtez egon zen atea zaintzen, eta 1980an erretiratu zen. 467 partida jokatu zituen Espainiako Ligan, 93 Kopan, eta 55 Europako lehiaketetan.

Garaipenen artean ditu bi Kopa, eta garaipentzat har daitekeen beste hau: UEFA Kopako txapeldunorde izan zen 1962an. Espainiako selekzioarekin 1964ko Eurokopa ere irabazi zuen. Atea utzi, eta aulkian eseri zen. Bilbao Athletic, Athletic… eta egun, Euskal Herriko futbol selekzioa ari da zuzentzen.

Sartu zuen gol hari beste bat gehituko lioke gustura: ofizialtasunarena. Gol historiko bat sartu eta gero, beste hori lortzeko lanean dabil. Ikurrina legezkoa izan dadin selekzioen arteko txapelketa handietan ere.