Zuloa sarean
DEPORTIVO 1
ATHLETIC 1
Jokoz askoz gehiago izan da Athletic, baina puntu bakarra ekarriko du. Llorentek sartu du berdinketaren gola.
- Athleticek antzinako arrantzaleena egiten du: arraina harrapatzera betiko tresnekin ateratzen da. Ez du sare pelagikorik, ez da arrastrean ibiltzen den ontzia ere. Baxurako ontzia da, eta arazoak dauzka arrain asko harrapatzeko. Ondo aurkitzen ditu batzuetan arrain multzoak, gaur bezala, baina sarea ontzira jasotzen duenean, arrantza txikia jasotzen du: gaur, arrain bat. Hiru izan zitezkeenean.
- Nagusitu egin zaio Deportivori jokoan. Baliabide bakarra nahikoa izan du aurkaria dar-dar batean jartzeko: eskuin hegaletik erasotzea. Iraola, Susaeta (batez ere bi hauek) eta De Marcos erraz asko sartu dira etxekoen defentsa sarean. Askotan egin dute gauza bera, eta denetan gauza bera gertatu da gero: ezer ez. Horra denboraldi honetako beste gabezietako bat: nagusi izan baina aukerak sortzean asmatu ez.
- 11koan, ezustea eman du Bielsak: Llorente hasieratik. Partida ona jokatu du aurrelariak, sasoiko onena, batere dudarik gabe. Talde jokoari asko eman dio, gainerakoentzat erreferentzia izan da jokoa aurrera eramaterakoan, eta gainera, aurrelarien lan nagusia egin du: errematatu. Berak sartu du berdinketaren gola 43. minutuan, buruz (nola ez!). Aurretik ere egin ditu beste saiakera batzuk, baina ez du asmatu.
- Deportivok sartu du lehen gola, esan bezala. Neurketa osoan, kontraerasoan jokatzeko prest egon da, arriskuak tamainan hartuz. Halako taldeen aurka, beren baliabide hori mozteaz gain, beste hau egitea ere komeni izaten da: oparirik ez egitea. Egin du ba Susaetak, defentsatik erasorako trantsizioan baloia galduz leku txarrean. Bruno Garmak egin du beste guztia: zartako latza area ertzetik, eta baloia sarera.
- Atsedenaldian, 1-1, hortaz. Bigarren zatian ere jaun eta jabe izan da Bielsaren taldea. Eskuin hegaleko baliabidea erabiliz beti. Aukera onak izan ditu, Llorentek zutoinera ere bota du baloia. Ematen zuen denbora kontua izango zela bigarren gola heltzearena. Baina arrantzaleen sareak zuloa zeukan gaur ere. Arraina bat nahi beste, baina ezin harrapatu.
- Gainera, Iturrasperi bigarren txartel horia atera dio epaileak (ez zen falta bigarren txartelarena), eta hor ito dira Athleticen aukerak. Deportivok ez pentsa pausoa aurrera eman duenik hiru puntuen bila. Puntua ontzat joa zuen aspalditik, eta hor bukatu da gaurko arrantza saioa. Arrain bana bakoitzarentzat… eta Athleticen sareak sare-konpontzaileen artisautza lana behar duen ustea geratu da. Gaur ere bai.