Bi emaitza, sasoi honetako Txapeldunen Ligakoak: 2-1, eta 2-2. Hamabost eguneko tartean izandakoak. Borussia Dortmundek irabazi egin zion Real Madrili Alemanian, eta berdindu Madrilen (Espainia) gero. Multzoen fasean aritu ziren elkarren aurka.

Berriz dira parez pare. Finalerdietan. Joanekoa, gaur, Alemanian (20:45).

Elkar ondo ezagutzen dute, eta aurkaria lotzeko garaian eta besteari min emateko orduan lagungarria izango zaie ezagutza hori. Beti da lagungarria. Bi taldeak aztertzen hasita, Real Madril ez da kamaleonikoa, eredu zehatza da berea. Borussiak izan dezake, ordea, aukera zerbait aldatzeko. Final-laurdenetan Malagaren aurka atera zuen eredua eta Real Madrilen kontra erakutsi zuena ez baitira berdinak. Ikusi egin beharko da zein bide hartzen duen Kloppen taldeak.

Lotsagabea da Alemaniako taldea, eta finalerdietan aritzea handia da beraientzat. Ez dut esango galtzeko ezer ez dutenik, finala ez jokatzea sekulako galera baita behin finalerdietara helduta. Baina presioa, izatekotan, Real Madrilek dauka. Bera da faboritoa.

Bi taldeei gustatzen zaie kontraerasoan aritzea. Zitalak dira, biziak, azkarrak. Baliabide hori erabiltzeko, besteak hasi behar du baloia jokatzen. Real Madrilek, alde horretatik, ez dio opari handirik egingo. Ez lioke egin behar, behintzat.

Erritmoa ere kontuan hartu beharko da. Bizia bada, edozer gerta daiteke. Partida irekitzea komeniko zaio Borussiari, saltsa horretan sartu nahiko du partida; Real Madrilek kontrol handiagoa nahiko du. Ea nork ezartzen dion berea besteari.

Xake partida bezalakoa izango da. Zuriak ala horiak garaile?