Zeruak eta lurrak bat egin dute
DEPORTIVO 0
REALA 1
Txapeldunen Ligan ariko da Reala, aurre-kanporaketan, bere lanak egin eta Valentziak Sevillan galdu ondoren.
- Txapeldunen Liga. Realaren hurrengo geltokia. Abuztuaren erdialdean. Aurre-kanporaketa. Aurkaria potoloetako bat: Milan edo Arsenal, akaso, beste aukera batzuen artean. Duela hiru urte Bigarren Mailatik igo eta gero. Ikaragarria da Realarena.
- Berea irabazi behar zuen Coruñan, eta irabazi du. Nola edo hala, baina irabazi du. Valentziak galdu egin behar zuen edo berdindu Sevillaren zelaian, eta galdu egin du. Gertatzen dira halakoak noizean behin. Gaur, adibidez. Zeruak eta lurrak bat egin dute meigen lurraldean, eta sari potoloa eskuratuta amaitu du Liga Realak.
- Nola edo hala idatzi dut, eta ezin da egia ezkutatu. Oso partida txikia egin du taldeak; batez ere, bigarren zatian. Deportivoren mende egon da, jokoa landu ezinik, atzetik atera gabe… eta galiziarren kamustasunari eskerrak ematen. Gaizki defendatu du, eta Deporrek atzealdean zuloak utzi arren kontraerasoan ateratzeko, lapurtu egin behar zuen baloia lehendabizi Realak, eta oso gutxi lapurtu ditu.
- Lehen zatiaren erdialdera Griezamannek sartu du gola, Agirretxeren jokaldi eta jaurtiketa on bati segida emanez, eta gol horren errentarekin bizi izan da taldea amaiera arte. Egoki jarri zaio neurketa Deportivo zanpatzeko. Mailari eusteko irabazi egin behar zuen Deportivok, eta arriskuak hartu ditu ezinbestean. Baina Realak ez du lan ona egin defentsan, eta ezin kontraerasoa baliatu. Eta baliatzeko aukera izan duenean, oso baldar ibili da, jokaldiak amaitu ezinda edo gaizki amaitzen.
- Kontuak kontu, Deporrek ez du asmatu, eta Reala Txapeldunen Ligan da. Montanierren aroa amaitu da, eta beste batena hasiko da orain. Jokalari denei edo ia denei eustea lortuz gero, ametsetan jarrai dezake Realak.