Zein da hurrengoa?
EUROKOPA 2012
Alemania final-laurdenetan da, Greziari erraz irabazi eta gero (4-2).
- Lautik lau. Bostetik bost egiten badu, eta seitik sei, Alemaniak irabaziko du Eurokopa hau. Hala ere, goazen pausoz pauso: laugarren partida jarraian irabazi du gaur, final-laurdenetakoa. Ez dio aukerarik eman Greziari (4-2).
- Aldez aurretik iragarrita zegoen partida atera da, eta ez emaitzagatik bakarrik. Jokoan, Alemaniak izan du ekimena, Grezia atzean (oso) sartuta egon da. Baloia hartu eta mugitu. Pazientziarekin, baina lo hartu gabe. Aurkariaren atearen bila, eta ez baloia edukitzeagatik bakarrik eduki. Askotan egin du bide hau baloiak: erdiko atzelariak-Schwensteiger-Ozil-hegalak. Barrutik barrura, berriz barrura baina hegal aldera, eta hegalera erabat irekita.
- Khedira sekulako txapelketa ari da egiten. Real Madrilen beste zeregin batzuk dauzka, ilunagoak, eta horretan ere ondo moldatzen da. Selekzioan askatasun handiagoa du, gehiago hartzen du parte erasoan, areara askotan iristen da, eta bikain ari da. Stuttgarteko jokalaria haren parekoa da selekzioan. Gol ederra sartu du, 2-1ekoa (61. minutuan).
- Aurretik, Greziak berdindu egin du (Samaras, 55. minutuan). Kontraerasoan, Greziaren baliabide bakarra gaurkoan. Baina Alemaniak egindako huts handien eraginez aritu da kontraerasoan, aritu izan den gutxian. Erabat egon da Alemaniaren mende.
- Ezohikotik ere izan du neurketak. Hasteko, Lowek atera duen 11koa: Reus, Klose eta Schurrle, hasieratik; Podolski, Mario Gomez eta Muller, aulkian. Golegileak, gero: Lahm, Khedira (ez dira golegileak), Reus eta Klose (bi ordezko). Greziak bi gol sartzea, eta berdinketa lortzea, ia mirariaren parekoa.
- Grezia osoan ez al dago atezainik? Sifakis hau eskas, eta txapelketaren hasieran aritu zen Chalkias, beste horrenbeste.
- Buruko indarra. Greziak berdindu eta gero, inork espero ez zuenean, Alemaniak ez du denbora galdu gol horren damuan, kezkaren itoan… Bereari eutsi dio, eta di-da eman dio 2004ko txapeldunari.
- Gerora begirako kontu bat: sendoa da Alemania, eta finalerdietan izango duen aurkaria baino sendoagoa bai, oraingoz (Italia edo Ingalaterra). Baina astia izanez gero, azter ezazue defentsan egiten duen lana, eta atera ondorioak. Bigunetik uste baino gehiago ez ote duen…