ZALANTZAK

• Joan dira egun batzuk, hamabi, Athleticek eta Bartzelonak azkenekoz jokatu zutenetik. Harrezkero, entrenatu baino ez dute egin. Gaur, berriz ere zelaira, zertara eta Espainiako Kopako finala irabaztera. Egun asko dira partidarik jokatu gabe.
• Lehia eza horren eragina zein izango den ez dago argi. Normalean, txarrerako izaten dira halakoak, eta berriz jokatzen hastean, kostatu egiten zaie jokalariei partidan txukun aritzea.
• Athleticek bigarren finala du tarte txikian. Europako Ligakoan, oso urduri aritu zen taldea. Gaur ere bai? Ala gaur lasaiago jokatuko dute?
• Baloi bakarra, eta baloia behar duten bi talde lehian. Nork limurtuko du arnasa bezain beharrezkoa duten tresna biribila?
• Bartzelonak ez zuen neurria eman azkenekoz lehiatu zuen partidetan. Bai baina ez aritu zen. Bere betiko estilo landua osatu ezinik. Gaur ere horrelako ariko da, ala aurkariak zanpatu izan dituena ikusiko da?
• Vicente Calderoneko zelaiaren egoera nolakoa izango da? Aldatu berri dute, berria da, baina behar bezala ureztatuko al dute? Eta belarra motza egongo al da?

ZIURTASUNAK

• Ez dago dudarik honetan: bi taldeek zer eredu edo estilo azalduko duten. Baloiaren jabetzan oinarrituz, jokalarien dinamismo orekatua, eta defentsan, presio itogarria. Atzo, El Pais egunkarian, Javier Mascherano Bartzelonakoak esan zuen bezala, “buruz buruko lehiak izango dira zelaian barrena”.
• Faboritoa Bartzelona da. Argi eta garbi. Inork ez du zalantzarik egiten honetan: berea egiten badu, lan txarrak izango ditu Athleticek.
• Golak sartzeko aukerak asko izango dira. Gehien asmatzen duena, txapeldun. Edota gehien geratzen duena.
• Geldikako jokaldietan, aldekoetan, Athleticek aukera polita dauka Bartzelonari min egiteko. Baliatu beharreko baliabidea izan behar du.

ERANTZUNAK

• Gaur gaueko hamarretatik aurrera. Zalantzak uxatuko dira, batera edo bestera, edo inora; eta ziurtasunak bete egingo dira, edo ez.