Egurra jaso du Realak Bernabeu zelaian (5-1). Baina okerrena da Real Madrilek ez duela zapaldu. Gutxirekin denboraldiko partida erosoena izan dute etxekoek. Eta horrek ezer onik ez du adierazten aurkariaren inguruan. Kasu honetan, Realaz.

Epel. Hotz. Bigun. Federik gabe. Koldar. Eta antzeko beste adjektibo eta azalpen guztiak ere jar daitezke segidan. Ez dute sinetsi irabazteko aukerak zituztenik, eta hori da edozer egiteko aurreneko oinarria. Real Madrilen zelaian halako jarrera askotan izaten ari da Reala azken denboraldietan. Zaharrak berri izan da gaurkoa.

Ez du ohi bezalako ereduarekin jokatu Montanierren taldeak. Atzean eustera atera da, baloiaren jabetzan oinarri beharrean, bestetan bezala. Horretarako, atzealdean 5 jokalari sartu ditu entrenatzaileak, 4 erdian eta 1 goian. Hori ondo egiteko, atzean sartu, lana egin, baloia berreskuratu eta gora joateko, sinetsi egin behar da lehendabizi. Sakrifizio handia eskatzen du. Eta oldarkortasuna. Realekoek gaur halako ezer ez dute eduki.

Bosgarren minuturako galtzen ari zen. Eta 40. minuturako 3-0. Segituan sartu du Xabi Prietok gola, eta atsedenaldia 3-1ekoarekin joan dira.

2. zatian ere, pausoan

Mikel Gonzalezek min hartu du atsedenaldiaren aurretik, eta Zurutuzak ordezkatu du. 4-3-3 marrazkiarekin hasi da orduan Reala, eta bigarren zatian ere horixe erabili du. Baina marrazkiak marrazki, oinarrizko gauzarik gabe, alferrik da beste guztia. Bigarren zatiko 11. minuturako, beste bi gol sartu dizkio Real Madrilek.

Hortik aurrerakoa pausoan joan da. Aurreko guztia bezalaxe. Real Madril erraz, eta Reala egonean. Bukaera aldera baloiaren jabetza izan du Realak, baina arriskurik ez sortzeko.

Sailkapenean, 33 punturekin segituko du Realak. Atzekoek bihar zer egingo duten begira. Horretan ere, zaharrak berri.

Bideo honetan, partidako golak: