Jo zion telefonoak Unai Emeryri duela hilabete batzuk: rin, rin… rin, rin… Beste aldeko ahotsak: txin, txin, txin, txin, Errusiako diruaren hotsa… Eta Hondarribiko entrenatzaileak baietz.

Hiru denboraldiko lan hitzarmena paperean sinatua.

Baina futbolean, pertsonek baino golek eta emaitzek ziurtatzen dituzte kontratuak. Aldekoak badira, beste paper zatia mahai gainean, eta onenera jota, papera zuri. Pagotxa. Baina ez badira aldekoak, beste paper bat sinatzera behartzen zaitu klubak: finikitoa.

Nolakoak ote dira Errusian finikitoak?

Galdetu Unai Emeryri. Egunotan sinatuko du bat, sinatu ez badu dagoeneko. Gaur bertan kendu du entrenatzaile lanetik Spartak Moskuk. Atzo, hiriburuko derbian, astindua eman zion Dinamok (1-5).

Berria jakin bezain pronto, berriemaileek txalo jo diote erabakiari. Errusia urrun dago hemendik, baina hango eta hemengo futbola ez dabiltza oso aparte. Izan ere, kontratuak ziurtatzeko eta betetzeko garaian, baloiak eta emaitzek ez ezik, kazetariek ere eragina dute. Errusian ere bai.

Urrutiko intxaurrak hamalau, gerturatu eta lau.