Txoriek ihes egin diote
OSASUNA 0
ESPANYOL 2
Punturik gabe geratzea ez merezi arren, alerik gabe geratu da Osasuna, eta bost puntura murriztu dio aldea azken-hirugarren sailkatuak.
- Kaiolak ondo zaindu behar dira: garbitu, txukundu, aldatu beharrekoa aldatu…txoriak alde egiteko tentazioa izango ez badu. Hiru izan ditu asteon Osasunak kaiola barruan, Valladolidetik ekarritakoak. Baina orain, momentu honetan, eta aste guztirako, batere gabe geratu da. Txoriek ihes egin diote kaiolatik. Beste txori baten liraintasunak eta txioak erakarrita: Espanyoleko perico txikiarena.
- Merezita izan edo ez, alferrik jardutea da. Baina aipatu egin behar da, eta garbi esan Osasunak ez zuela punturik gabe geratzea merezi. Egin ditu ahaleginak eta saioak ezer gabe ez geratzeko, baina jardunaren parekoa izan da: alferrik.
- Lehen zatian, oso deseroso egon da taldea. Espanyolek berak egin ohi duenarekin zigortu du: bere zelaian estutu du, eta Osasuna gatibu egon da bere zelaiaren erdian. Ezin jokoa landu, ezin lotu jokaldiak, eta baloiari gozotasuna eman ordez, garraztasun ukenduak eman dizkio. Ezin lauzpabost pase jarraian eman. Horrek beste eragin txar hau ere izan du: erritmoa makala izan da, eta Osasuna eroso bizitasunean bizi da.
- Espanyol zitala da kontraerasoan, eta halako taldeei gertatu ohi zaiena (aztertzekoa da zergatik gertatzen den hau) gertatu zaio: berari ere min egiten diotela kontraerasoan. Aldeko geldikako jokaldi batean izan da: kornerraren bigarren jokaldia Osasunak harrapatu du, eta kontraerasoan, dena alde izan du. Baina Kike Solak errazena zail egin du: baloia sarera bota beharrean kanpora bota du.
- Bigarren zatia hasi orduko, kolpea eman dio Espanyolek: korner batean, gola sartu du. Partidak estu daudenean, egin ahalak eta bi egin behar dira geldikako jokaldietan, erabakigarriak izan daitezkeelako: alde direnean baliabide ona direlako, eta kontra direnean, ez zaiolako utzi behar aurkariari minik ematen. Teoriatik praktikarako bidean kale egin du Osasunak, eta Hector Morenok gola sartu du.
- Espanyol atzean sartu da, eta Osasuna hasi da erosoago ibiltzen. Puñalek Lolo ordezkatu du, eta kapitaina eta Silva libreago ibili dira sormenean. Espanyolek hegal bat ixten zuen defentsan, baina beste aldearen ordainetan, eta Osasunak izan du pazientzia nahikoa baloia hegal batetik bestera eraman eta zuloak aurkitzeko. Gola ere sartu du Ninok, erdiraketa bat buruz baliatuz, baina jokoz kanpokoa adierazi dio marrazainak.
- Minutu onak izan dira Osasunarenak, izan ditu aukerak, ia denak urrundik egindako jaurtikeketan, baina Casilla atezaina dotore aritu da. Azken minutuetan, Javier Agirre bizi ibili da, eta ikusirik Puñal eta Silva nagusi zirela, Tejera atera du zelai-erdia lotzeko. Zailtasun horien aurrean, edo bestela, azken minutuetan egin ohi dena egiteagatik (presagatik), Osasuna baloi luzeak botatzen hasi da. Llorente ere zelaian zen, baina joko zuzenarena aukera txarra izan da. Baloi bat urrundu eta gero, Espanyolek bigarren gola egin du (Wakaso). Luzapeneko minutuak ez ziren oso aparte. Txoriek kaiola utzita zeukaten ordurako. Bost puntura gerturatu zaio orain Osasunari azken hirugarrena: Deportivo.