Teoria erraza da; praktika, zaila
REAL MADRIL 5
ATHLETIC 1
Batere aukerarik ez zuen izan Athleticek, eta egurra eman zion Real Madrilek.
- Teoria azaltzerakoan partida baten aurretik dena ondo ateratzen da. Aldagelan edota hotelean, entrenatzaileek ematen dituzten azalpenen antzekoa da: arbelean, beti irabazle. Teoria.
- Praktika zelaian erakutsi behar da, eta zaila izaten da teorian azaldutakoa gauzatzea. Horixe gertatu zitzaion Athletici atzo Real Madrilen zelaian.
- Teoriak zioena: baloiaren jabe egin, taldeak metroak irabazi, eta erasotik defentsara pasatzeko unean, presio itogarria egin.
- Praktikan gertatua: txukun hasi zen taldea, baloia erabiliz, baina ezin sakontasunik lortu. Bertikaltasuna du oinarrietako bat Bielsaren teoriak, baina horizontala izan zen atzo hasierako tarte horretan. Asko kostatzen ari zitzaion aurkariaren lerroak gainditzea. Real Madrilek gutxiago erabili zuen baloia, ez du askorik behar, eta azkar heldu zen Athleticen area inguruetara. 1-0 Benzemak. Eta barneratzen zailagoa izan zen: 2-0ekoa, Sergio Ramosek, geldikako jokaldi batean. Hortik aurrera, teorian idatzia desagertu egin zen: agur Athletic. Azaldu zen geroago, Ibai Gomezek gola sartu zuenean lehen zatia bukatzear zela. Bigarrenean, teoriari heldu zion taldeak, eta goian presionatzen hasi zen; etekina, ordea, hutsaren parekoa. Real Madrilek ere bazuen bere teoria, eta kontraerasoa zutabe bertan. Aukera-aukeran zeukan Athletic oso goian zebilelako, eta teoria praktikan gauzatu zuen. 4-1 eta 5-1.