Talde izan, edo ez izan
BAYERN 4 BARTZELONA 0
Astindua eman dio Bayernek Bartzelonari Txapeldunen Ligako finalerdien joanekoan.
- Bayernek eta Bartzelonak biek dituzte egundoko taldeak, baina gaur-gaurkoz, talde izaera Bayernek dauka. Bartzelona bidean galtzen ari den hori. Taldeak zapaldu egin du duela gutxi arte taldea zena, eta Txapeldunen Ligako finalean dauzka bi hankak, oinak, gorputza eta gainerako guztia.
- Lau gol sartu dizkio Bartzelonari, eta izan zitezkeen beste batzuk ere. Eta ez harritu itzulikoan beste sarraskia egiten badio. Bayern hau ikusgarria da, eta erregistro guztiak menderatzen ditu: defentsan sekulako lana egiten dute jokalari guztiek, eta erasoan zitala da, batez ere kontraerasoan. Bartzelona ahuldu hau biktima erraza izan da alemaniarrentzat. Hasi eta buka.
- Bartzelonak erakutsi du gaur jakina den hau: baloiaren jabetza edukitzeak ez du ezertarako balio sakontasunik gabe. Portzentajean askoz gehiago izan du, baina Neuer atezainak apenas egin behar izan du geldiketarik. Bayernek, aldiz, kontrakoa egin du: baloia gutxi erabili, baina abiaduraz eta oso bertikal, beti Valdesen atea helburu. Lau gol sartu ditu horrela.
- Batek baloia eta defentsako talde lanik ez. Besteak defentsako egundoko talde lana, eta kontraerasoa. Zapaldu egin du Bayernek Bartzelona. Lau goletatik bi legearen marraz haratagokoak izan direla? Hor nonbait, baina jokaldi horietan ez bazen, besteren batzuetan sartuko zituen Bayernek. Jokoan ikusitakoa adierazten du markagailuak.
- Bayernek ito egin ditu Xavi, Busquets eta Iniesta, beti baitzuten aurkariren bat gainean. Bizkarrez hartzen zutenean baloia, ikusgarria izan da nolako presioa egin dieten alemaniarrek… eta euskal herritar batek: Javi Martinezek. Hiru sortzaileak itota, eta beraien aurrekoak geldi, estatuen moduan, baloia oinetan noiz jasoko zain, bila joan beharrean. Arlo horretan, deigarria izan da Messiren lan txarra. Lehen zatian, oso behean ibili da baloi eske, eta hartu duenean, ez du minik egin… eta gainera, Bayerneko zelai-erdiaren bizkarrean laguntza bat gabe utzi du taldea. Oso gutxitan gainditu du alemaniarren zelai-erdiko lerroa Bartzelonak…lehen maisuak ziren horretan, baina azkenaldia, desagertu egin zaio bertute hori.
- Dani Alves izan du erasoko makulua ia partida osoan zehar. Baina Ribery izan du beti lasterkadietan alboan. A ze lana egin duen frantziarrak. Bayernek ezker hegala itxi egin dio Bartzelonari, eta eskuinean zuloa aurkitu izan duenetan, alferrik izan da. Eraginkortasunik ez. Hegal biak itxi dizkio, egia esatera, baloia non zegoen kontuan izanda, eta beste aldea izan du libre Bartzelonak; baina eskuinaldetik bideratu ditu ia eraso guztiak.
- Lehen bi golak geldikako bi jokaditan sartu dizkio Bayernek. Bigarren jokaldian, biak. Horretan ere zapaldu egin du etxeko taldeak Bartzelona. Beste bi golak kontraerasoan sartu dizkio, bigarren zatian.
- Bartzelona honek galdua dauka lehengo Bartzelona hark zeukan oreka. Erasoan ondo defentsan hobeto aritzeko, eta alderantziz. Hura zen lehengoaren izaera. Oraingoak ez du orekarekin erasotzen, eta defentsan berandu heltzen dira jokalariak presiora… distantzia gehiago eginda. Nekea da lan horren ondorioa, eta Bartzelona hau nekatuta dago. Bayern ez dago nekatuta. Sasoiko dabil, indartsu, zapaltzaile, eta ematen du parean jartzen zaion edonor botako duela kolpe batekin. Gaur, lau jo dizkio Bartzelonari: Mullerrek (2 bider), Mario Gomezek eta Robbenek. Atzetik talde osoaren lanaren akuilua zutela. Horra alde nagusia bien artean.