Perfekziotik gertu
Pep Guardiolak 13 titulu irabazi ditu lau denboralditan. Garaipen handiak dira, baina horien alboan edo gainetik jarri behar da jokatzeko eredua. Lehendik zetorrena biribildu egin du. Eta beste arlo askotan ere eredugarria izan da. Lau denboralditan ereindako uzta jaso dugu.
- Duela lau urte zalantzaz beterik hartu zen futbolaren munduak albistea: Pep Guardiola zen Bartzelonako entrenatzaile aukeratu berria. Ezezagunari edo berriari zaion beldurrak edo kezkak eraginda. Berehala uxatu zituen mamuak.
- Emaitzen diktadurak erabat janda dauka futbola. Guardiolak bota egin du diktadura, iraultza eragin du, iraultza baketsua, jokatzeko eredu zehatza arma eraginkorrena dela erakutsiz. Molde batean oinarrituz irabazi ditu 13 titulu. Eta galdu ere molde horretan oinarrituz galdu ditu. Horregatik emaitzen diktadura botatzearena.
- Prozesua edo bidea emaitzen gainetik. Emaitzekin erabat itsututa daudenek sortzen duten itomenaren inguruan, arnasa. Freskoa eta sanoa. Eta bidean oinez ibiliz, pauso sendo bezain dotorez, tituluak irabazi, gainera.
- Bartzelonaren jokatzeko eredua katea da. Oinarri batzuen gainean sortzen joan da, entrenatzailez entrenatzaile. Bakoitzak eman dio berea kateari. Entrenatzaile bat, katebegi bat. Guardiolak umetatik barneratu zuen eredua, eta berak bere katebegia jarri dio. Mold(e)atu egin du. Biribildu. Beste inork ez bezala aurretik. Zehaztasuna eman dio ia zehaztuezina zirudienari. Kontzeptu zaharrak berritu: hirugarren jokalaria; urrun dagoenari begiratu lehendabizi; aurkariaren lerroak hausteko bideak doitu eta abar.
- Ikusgarri onak ziren jokalariak are hobeak bilakatu ditu. Berezko ezaugarriak eta dohainak taldearen mesedetan ipiniz, zirenak baino hobeak dira orain Xavi, Iniesta, Messi, Busquets, Puyol, Pique, Mascherano eta beste guztiak.
- Fanatismoak itsututa sufritzen dutenak izan ezik, beste futbolzale guztien bigarren taldea edo hirugarrena edo, zehatz esanda, talde estimatua Bartzelona izatea lortu du. Jokatzeko eredu ikusgarriari esker.
- Ona kopiatu egin behar omen da. Guardiolaren Bartzelonari esker, futbolaren itsaso zabalean olatu txikiak sortu dira, eredua kopiatu nahian, olatu urdin eta granateak. Pentsarazi egin dio futboleko jendeari ereduen etenik gabeko eztabaida zaharrean.
- Eredu zehatza zelaian, eta zelaitik kanpo ere bai. Errespetua, hitz gozoak, azalpenak… gizon jokatu du Guardiolak. Hori ere kopiatzeko modukoa. Kopiatu beharrekoa. Erakutsi beharrekoa. Eredua. Erakutsi du futbola hezkuntza ere badela. Erakutsi du futbola baliabide oso ona dela balio egokiak zabaltzeko eta erakusteko.
- Taldeko lana indartu du zelaian. Eta lan egiteko moduan ere taldea guztiaren gainetik. Hogeitik gora laguntzaile izan ditu alboan. Denak beharrezkoak. Entrenatzaileren irudi harroa, “nik dena daukat kontrolpean” hori eraldatuz. Lan egiteko beste bide bat zehaztu du entrenatzaileen inguruan.
- Nekatu egin da. Erre. Gogoeta sakona eragin behar du horrek futboleko jendearen artean. Zergatik nekatu da? Zerk erre du? Jokalariek ez dute nekatu, ez dute erre. Egunero entrenatzera joan beharrak ez du nekatu, ez du erre. Futbolaren inguruko farandula eta antzerki guztiak nekatu eta erre du. Neurriz kanpoko presioa dago futbolean. Baita munduko talde onenean ere. Tragedia da hori. Guardiolak futbolean behar du, futbolak Guardiola behar du. Sakoneko aldaketa behar du futbolaren inguruko guztiak.