Ospitaleko eskaileretan gurutzatu dira
ATHLETIC 1
OSASUNA 0
Adurizen golarekin irabazi diete zuri-gorriek gorritxoei.
- Athletic zaintza berezietan zen 18:00etan, eta Osasuna gela arruntean. Orain, Osasuna dago zaintza berezian, eta Athletic ospitaletik atera da. Gurutzatu egin dira San Mamesen.
- Behar gorria zeukan Bielsaren taldeak, eta bera garaile. Osasuna lasaixeago joan da, baina estu, jaitsieran zelako, eta orain, behar gorria pasatu dio ospitaletik atera denak bertan segitzen duenari.
- Sendatu denaren agiria jaso du Athleticek gaur, baina aldian behin, azaldu egin beharko du sendagilearenera, zauriak erabat sendatuta dituen ikustera. Gaurkoa, zantzua izan da, eta hobekuntzak jarraitu egin behar du. Bestela, berriz ere ospitalera.
- Hobekuntza gauzatu egin da lehen zatiko minutu askotan. Baloia lagun aspaldiko partez, jokalarien mugimenduak eta tresna biribilaren mugitzea bat izan dira. De Marcosek puskatu egin du gaur, Herrera zelaian egon dela ere igarri egin da, eta Muniani deabrukeriak egitea ez zaizkiola ahaztu ikusi du zaleak. Atzealdekoak ere, gauza handirik egin gabe, aurrekoetan baino sendoxeago aritu dira.
- Gero, aparteko lekua merezi du aurreratuenak: Adurizek. Baloia hegaletan egon denean, ederki zoratu ditu Osasunako erdiko bi atzelariak, Lolo eta Arribas. Ihes egin die gehienetan, eta horrelako batean sartu du gola. Eskuinetik dotore egin du jokaldia taldeak,eta Adurizek are dotoreago txikitu du baloia, kontrolik egin gabe.
- Golaren ondotik, nagusi izan da Athletic. Aurretik gertatua berretsi egin du, baina indartsuago, golak eman dion konfiantza zakuarekin.
- Osasuna galduta zebilen. Defentsako lana aurrelariek hasten dute, eta hortik nahasmendua sortzen bada, beste guztiak salduta geratzen dira. Halaxe gertatu zaio. Athleticen eskuinaldetik jasan ditu eraso gehienak. Jakina da zer egiten duen Bielsaren taldeak taktikoki halakoetan, baina ezin lotu Osasunak. Jokalari asko lekuz kanpo.
- Baloiarekin ere eskas, makal, idea handirik gabe eta taktikoki baldar. Ondorioa: orduaren erdia jokatzerako, bi aldaketa egin ditu Mendilibarrek. Lamah eta Puñal jokora, Sisi eta Annan zelaitik kanpora.
- Aldaketek eman diote zerbait taldeari, Lamah bizi eta eraginkor samar aritu delako. Bere erdiraketa batean, baloiak langa ere jo du.
- Bigarren zatian, Athletic ez da hain oldarkor ibili. Osasunak gora egin du, eta ez bakarrik erasoan; defentsan ere, atzeko lerroa lehen zatian baino aurreratuago izan du. Baloia eduki bai, baina aukera garbienak Athleticek. Bat, bi eta hiru, lau ere bai… eta ia denetan, Andres Fernandez atezaina jaun eta jabe. Lehen zatian ere egin behar izan ditu gelditu eta urruntze batzuk. Bera izan da bere taldeko onena. Seinale ona ez da.
- Bukaeran, Timorrek ia berdindu du neurketa, falta batean baloiari zartako latza emanda. Zutoina harrapatu du bete-betean. Sartu izan balitz, piztuko zen zalantza, balizko berdinketa hori justua zitekeela eta ez zitekeela. Ez litzateke justua izango, gaurko hiru puntuak Athelticek merezi izan dituelako. Ospitaletik atera den eriak. Han utzi du Osasuna, sendatu ezinda. Gaurkoa ikusita, larri.