• Talde batzuek nortasuna daukate, beste batzuek ez. Zer da nortasuna? Gaur Realak erakutsi duena. Beti erakutsiko balu…
• Nortasuna da defentsako lanean oldarkorra izatea, baloia lapurtzera joatea, faltak egin behar direnean faltak egitea, taldekideari laguntzak ematea, goiko baloietan indartsu jardutea, aurkariari aurrea hartzea…
• Nortasuna da erasoan egin behar duzuna sendotasunez egitea, konfidantzarekin. Baloiak zelaiaren gainean ibili behar badu, zelaiaren gainean ibili behar du, aurkaria gertu egonagatik. Gaur, Realak, baloia luze jo du beste aukerarik ez zeukanean bakarrik. Gainerako aukera guztietan, paseen bidez lotu dira jokalariak.
• Nortasuna da bigarren zati osoa hamar jokalarirekin aritu, eta lanean segitzea, punturen bat atera daitekeela sinetsiz, amore eman gabe.
• Nortasuna da, hamarrekin jokatu arren aurkariaren areara heltzea eta aukerak egitea. Xabi Prietoren aukera on hartan bezala, adibidez.
• Nortasuna da denbora galdu behar denean galtzea. Agirretxe maisu aritu da, esaterako, azkeneko minutuetan.
• Nortasuna da momentu txar batzuk pasatu ondoren, berriz ere aurrez zehaztuta zegoen jokoa egitea, baloiaren jabetzan oinarrituz.
• Nortasuna da Montanierrek erakutsi duena, aldatu beharrekoa aldatuz; batez ere, Carlos Martinez atera duenean, Estradari laguntzeko. Malaga asko ari zen zelaia zabaltzen, eta bost atzean jartzea aukera ona izan da.
• Nortasuna da Bravorena. Goiko baloietan arnasa eman dio taldeari, segurtasun handiz aritu da.

Nortasuna. Horra Realaren gaurko partida azaltzen duen hitza.