Nomadak etxean aurkitu du etxea

Data: 2012/05/02

Roy Hodgson, Ingalaterrako selekzioko entrenatzaile berria, taldez talde eta selekzioz selekzio ibili da bere ibilbidean.

Duela sei urte, hau idazten ari zena Helsinkin zegoen, Finlandiako hiriburuan. Asteazken bat zen, eta hiritar asko leku berera joaten ikusi zituen. Ia denek zuten soinean lepokoa. Eta ez zen hotz egiten zuelako. Zuriak eta urdinak ziren lepoaren jiran ipinita zeuzkatenak. Finlandiako banderaren koloreak.

Denak zihoazen Olinpiar Estadiora. Futbola zegoen. Finlandia eta Ipar Irlanda aurrez aurre. Joan, ez joan egon zen hau idazten ari zena, baina azkenean, ez joatea erabaki zuen. Jakin-mina asetze aldera, Interneten begiratu zuen neurketa haren berri izateko: 2008ko Europako selekzioen Kopara sailkatzeko lehia zen. Gehiago jakin nahian, bi selekzioetako kideen berri izan zuen. Baziren jokalari ezagun batzuk Finlandian, Jari Litmanen eta, baina gutxi egia esatera. Ezagunena entrenatzailea egin zitzaion: Roy Hodgson (Croydon, Ingalaterra, 1947).

EFE

Burua lanean jarri, eta gogora etorri zitzaion zein taldetan ibili zen aurretik. Bi etorri zitzaizkion gogora, horrela bat-batean: Inter Milan eta Suitzako selekzioa.

Putzuzulo handi bateko bi tanta baino ez dira talde eta selekzio hori. Izan ere, makina bat lekutan ibilia da Hodgson entrenatzaile lanean. Futbolean badira bera bezala jardun duten asko. Nomadak. Leku batetik bestera, inon sustraitu gabe, inon egonkortu gabe. Beti maleta atearen ondoan.

1976an ekin zion bideari. Suediara joan zen, Halmstad taldera. Handik aurrera, jo batera, jo bestera, eta ia leku guztietan txapelketaren bat irabaziz. Hauxe du curriculuma:

1976-1980: Halmstad (Suedia)
1982: Bristol City (Ingalaterra) eta Oddevold (Suedia)
1983-1984: Orebro (Suedia)
1985-1989: Malmoe (Suedia)
1990-1992: Neuchatel (Suitza)
1992-1995: Suitzako selekzioa
1995-1997: Inter Milan (Italia)
1997-1998: Blackburn Rovers (Ingalaterra)
1999: Inter Milan (Italia)
1999-2000: Grasshopper (Suitza)
2000-2001: Kovenhavn (Danimarka)
2001: Udinese (Italia)
2002-2004: Arabiar Emirerri Batuetako selekzioa
2004-2005: Viking (Norvegia)
2006-2007: Finlandiako selekzioa
2007-2010: Fulham (Ingalaterra)
2010-2011: Liverpool (Ingalaterra)
2011-2012: West Bromwich Albion (Ingalaterra)
2012tik: Ingalaterrako selekzioa

Jokalari zenean, gutxiago mugitu zen. Behin bakarrik atera zen Ingalaterratik, eta Hegoafrikara joan zen, Berea Park taldera. 1973tik 1974ra egon zen han, denboraldi batez.

Hainbesteko joan-etorriei etekina atera die Hodgsonek. Ekonomikoa hor dago, bistan da. Baina kulturaren arloan ere jantzi egin da gizona. Hizkuntzak ikasteko balio izan dio, eta asko hitz egiten ditu: ingelesa, norvegiera, suediera, alemaniera, italiera, daniera, frantsesa eta finlandiera.

Nomadak azkeneko bost urteak etxean egin ditu, Ingalaterran, baina ez da geldirik egon. Taldez talde tarte horretan ere. Orain, ordea, lau urtez etxe berean geratuko da: bere etxeko etxe nagusian, Ingalaterrako selekzioan. Etxean geratuko da nomada. Desegin ote du maleta?