Athleticek ez ditu atzerritarrak fitxatzen. Ez daukate lekurik, filosofiak agintzen du, tradizioak. Logikak ere bai, uda honetatik. Gaurtik, zehatzago esateko. Gauzak oker doazenean gehiago oker daitezkeela nork esan zuen? Murphy izeneko atzerritar batek. Gaur azaldu da San Mamesen. Berriz ere itxiko die atea kanpotarrei Athleticek.

Katea Bielsaren eta zuzendaritzaren arteko aferak ipini zuten. Katearen beste begi bana Llorentek eta Javi Martinezek. Sutan dauden zale haiek beste bat, Lezaman azaldu zirenak. Eta gaur, Betisek jarri du oraingoz azkenekoa den begia, Beñat euskal herritarra buru (txiste txar baten traza eta guzti). San Mamesen azaldu, bost gol sartu, bai bost, eta hiru puntuak eraman. Danbateko latza hartu du Athleticek, jaietako su artifizialak hasi baino lehenxeago.

3-5 etxean. Ezer onik ez. Lehen zatian, negargarri. Alerik ez alde, hiru kontra. Panorama beltza. Kontraerasoan txiki utzi du etxeko taldea kanpokoak. Bat, bi eta hiru. Atzean sartu, baloia berreskuratu (zenbat izan dira opariak horietatik?), eta bizi atera. Botika ona atzean zuloak uzten dituena gaixotzeko.

Bigarrenean, onetik gehiago. Bueno, asko. Behar da barruan zerbait halako kolpea jaso, barneratu eta emaitza iraultzera ateratzeko. Horretatik asko dauka Athleticek. Baloia hobeto erabiliz, gutxi oparituz, eta azkar berreskuratuz, joan zen denboraldikoaren traza izan du taldeak. Bat, bi eta hiru ale barrura. De Marcosek bat, San Josek bi. Berdinketa. Hiru alde batetik, hiru bestetik. Hamabost minutu falta.

Halakoetan, atzetik datorrenak aurretik joan dena atzean utzi ohi du, baina gaur ez. Gauzak oker doazenean, Murphyk esan zuen zer gertatzen den. Sei minutuan beste bi kolpe eman dizkio Betisek, eta akabo suak eta festak.

Txarretik eta onetik. Txarrak zuzentzera, ona hobetzera. Bada lanik Lezaman egiteko. Egingo den zalantzarik bai?