Ez dago titularra pentsatzeko hitzen bila ibili beharrik. Manchester United-Athletic bakarrik jartzea nahikoa deigarria bada. Futbola maite dugun guztioi hortzak zorrozten dizkigun kanporaketa. Martxoaren 8an izango da joanekoa, Ingalaterran, eta itzulikoa astebete geroago, hilaren 15ean, Euskal Herrian.

Bi taldeek egin dute aurrera gaur. Biek ere etxean jokatuta, baina emaitza ezberdinarekin. Athleticek irabazi egin dio Lokomotivi (1-0), eta Manchester Unitedek galdu egin du Ajaxen aurka (1-2).

Muniainen gola

Estu ibili da Bielsaren taldea errusiarrak kanporatzeko. Gola egin beharra zeukan, eta horrekin eta Moskukoek alerik sartu gabe, final-zortzirenetan zen Athletic. Bi baldintzak bete dira azkenean. Aurreikusten zen bezala, lehia parekatua izan da, eta gol bakarra Muniainek egin du (62. min.), korner batean.

Estutasunak handitzeko, zuri-gorriek 10 jokalarirekin jokatu behar izan dituzte partidako azken 33 minutuak. Izan ere, Amorebieta beste denak baino lehen joan da aldageletara, bi txartel hori ikusita (60. min.).

Bielsaren adierazpen batzuk

• “Merezi izan dugu irabaztea, nahiz eta astun samar ibili garen baloia mugitzeko garaian. Ezin izan dugu baloiaren jabetza luzerik egin horregatik”.
• “Azkeneko ordu-erdian ondo defendatu dugu”.
• “Manchester Uniteden aurka jokatzea ez da edozein partida jokatzea bezalakoa”.

Couceiroren adierazpenak

• “Aukera handia galdu dugu sailkatzeko. Kanporaketa parekatua izan da, eta edozer gerta zitekeen”.
• “Etxetik kanpo gola sartzea falta izan zaigu aurrera egiteko”.

http://www.youtube.com/watch?v=P26ltddsp4w