Beti izan da zaila Real Madrilen aurka bere etxean jokatzea. Arrazoiak, mila. Denboraldi honetan ere, oso zaila da handik ezer onik ateratzea. Mourinhoren taldea izugarri ondo ari delako.

Realak aurkako jokalarien arduraz joan beharko zuen Madrilera: nork jokatuko duen, nola gera daitekeen halako, eta zein diren bestekoren ahuleziak… Futbolaz pentsatu beharko lukeela, alegia. Eta ondorio honetara helduko ziren txuri-urdinak: oso zaila da handik zerbait ekartzea.

Baina orain, egoera aldatu egin da. Bueno, Real Madrilekoek oso onak izaten segitzen dute, hor ez da aldaketarik. Futbola ez beste guztia da hizpide Espainia aldean asteazken gauetik. Real Madrili Vila-realen epaileak egundoko kaltea eragin ziola eta ez ziola, epaileen lana begitan hartuta daude han.

Eta han doa bihar Reala eremu arriskutsu horretara, gaur Montanierrek ederki esan duen bezala, “guk beraiek baino arrazoi gehiago dauzkagun arren, epaileez kexatzeko”.

Kontua da Real Madrilen jiran dabilen gai izarra Realaren ingurura ere igaro dela. Eta jakina, Realeko jokalariei ere eragingo die. Aurretik, eta partidan zehar. Epailearen beldurrez jokatuko dute.

Baina horretan zenbat eta gehiago pentsatu, okerrago. Mamuak ez dira harrapatzen. Egon, badaude, baina denbora galtzea da bila ibiltzea. Futbolean jokatzeko kaltea baino ez da mamuekin gogoratzea. Esatea erraza dela, eta egitea zailagoa? Ados.

Baina Realak futbolean jokatu behar du, eta bere mende dauden faktoreak ondo egin eta landu. Gero gerokoak. Kontrolatzen ez diren gauzetan denbora eta indarrak galtzea kalterako baino ez da.

Montanierrek, bi aldaketa egin ditu deialdian: Griezmann eta Ansotegi sartu ditu, Elustondo eta Estrada zigortuen ordez.

Real Madrilen, berri handirik ez da, baina Espainiako Federazioko Lehiaketa Batzordeak ez du zigortu Sergio Ramos, asteazkenean txartel gorria atera bazioten ere. Peperi bi partidako zigorra jarri diote, Mourinhori batekoa, Ozili ere batekoa…

Beldurrezko film baten itxura duen partida hau nola joango den? Bihar erantzunak, 20:00etatik aurrera.

Lehen itzulian, Real Madrilek irabazi zuen Anoetan (0-1). Bideo honetan, egun hartako gola:

http://www.youtube.com/watch?v=21IECDtgwzo