Lo lasai egingo du
EUROKOPA 2012
Portugalek irabazi egin die Herbehereei (2-1), eta final-laurdenetan da. Bi golak Cristiano Ronaldok sartu ditu. Herbehereak etxerako bidean da.
- Gaur gauean, Polonian edo Ukrainan, hotelen batean, jokalari batek lo lasai egingo du. Kendu ditu halako batean berak bere buruari jartzen dizkion mugak, kezkak eta obligazioak (berriz era jarri artekoa izango du lasaitasuna). Cristiano Ronaldok partida betea jokatu du Herbehereen aurka. Izarra bera izan da. Horixe nahi izaten du beti. Deskantsu ederra hartu du, alajaina!
- Bere bi golei esker sartu da Portugal final-laurdenetan. Beragatik izan ez balitz, kalean legoke taldea. Bera da herri oso baten salbatzailea. Horixe pentsatuko du barren-barrenean berak ere, eta gaur, lasaitu ederra hartuko zuen. Okerrena ez da berak pentsatzea hori; okerrena da berak pentsatzen duela beste denek berdin pentsatzen dutela. Eta kontrakoa dela konturatzen denean, burua lekutik mugitzen zaio: txorakeriak esaten hasten da, eta zelaian ez du neurririk ematen.
- Kontuak kontu, Portugalek etxeko lanak egin ditu. Galdu, irabazi eta berdindu. Horra hiru partidetako bidea. Emaitzei erreparatuz.
- Jokoari so eginez gero, hauxe dago eztabaidan: arriskatu gabe aritzea ez al da asko arriskatzea? Kontraerasoa du zutabe bakar. Defentsako lana behar da horretarako, eta izar handiena horixe denez, izarra, lan horiek ez ditu egiten. Datu hau beldurgarria da: Portugali sartu dizkioten gol guztiak Eurokopa honetan, bere ezker hegaletik hasitako jokaldiak izan dira. Bai, Cristinok hutsik uzten duen alde horretatik.
- Berez, baditu jokalariak baloia gehiago erabiltzeko, baina ez du nahi. Eta ez nahi izatea guztiz zilegia da. Dena baita futbola. Baina arrisku handi samarrak ez ote dituen hartzen…
- Aurkaria ere izan du gaur, orain arte apenas aipatu arren. Herbehereen lana oso txarra izan da: hiru partidak galdu ditu. Ustez faborito handienetakoa zena badoa etxera. Historiako deskalabru handienetakoa egin du, handiena ez bada.
- Ez da taldea izan. Goikoak gorako, eta behekoak, beherako. Bi talde, batean. Izarrak bai goian, baina bakarrik jokatzeko. Eta hori, jakina, taldearen kalterako izaten da. Herbereheetan eta edozein taldetan.
- Hausnarketa sakona egiteko ordua heldu zaie. Bitartean, Portugalek Txekia izango du kontrario datorren ostegunean, final-laurdenetan.