Datorren asteburuan, Anoetan, orduan hasiko da liga Realarentzat. Bai, egutegiak jartzen du gaur zuela hasiera, baina Bartzelona aurkari izanik, eta bere zelaian, gertatu dena gertatzeko arriskua handia zen. Belarri ondoan zast, eta etxera!

Bost gol ekarriko dituzte Realekoek bueltan. Aldekoa, bakarra. Hasi orduko galtzen, gero berdinketa Choryk, baina segituan, beste bi ale kontra. Eta hamasei minutu bakarrik jokatuta. Lehen zatian, beste bat ere jaso dute, laugarrena. Bigarrenean, azkenekoa.

Bartzelona jokatzen hasten denean, parean duen aurkaria txiki uzten du. Gaur Reala izan da, hurrengoan beste bat izango da, eta datorrenean beste bat, eta horrela… Sekreturik ez dauka Kataluniako taldeak. Egin behar zuena eta egiten dakitena egin du. Taldeko lan dohitua, eta gainera, izarren magia, aurkariak bideren bat ixtea halako batean lortzen duenean. Ezina aurkariarentzat, azken batean. Korrika eta korrika egitea baino ez dago.

Bada erremedio bat arnasa hartzeko. Baloia erabiltzea, eta atzetik ateratzea, ez itotzeko. Baina jakina, behar da aparteko abilezia hori egiteko, Bartzelonak egiten duen presioa gainditzeko. Oso gutxitan lortu du Realak. Apenas. Horrela aritu behar izan du baloiaren atzetik lasterka, edo ezintasunarekin, begira.

Liga liburua bada, gaurkoa ezinbestean irakurri beharreko kapitulu astuna da. Hitzaurrea dei dakioke. Hitzaren aurrea. Realaren kasuan, ligaren aurrea. Datorren igandean dator benetakoa.