• Buruz burukoen partida izan da. Oilarrak oilarrari. Athleticek eta Sporting Lisboak zaintza mota hori erabili dute defentsako lanean zenbait lekutan. Nor baino nor. Kanporaketa, eta batez ere, gaurko neurketa azaltzeko irudi ona da. Buruz buru bi talde, azkar, bizi, bakoitza bere baliabideekin, eta zintzo, kiroltasunez. Futbola berezkoa.
• Athleticek beti bezala jokatu du. Baloiaren jabe eginez, etengabeko mugimenduekin, aurkariak lekutik ateraz zuloak sortzeko, eta zulo horiek baliatuz. Taktika eta teknika elkarri uztartuta. Batek bestea behar du.
• Erritmo biziagoan erasotu du lehen zatian. Lasaixeago bigarrenenean.
• Sporting kontraerasoan aritzera etorriko zela iragarrita zegoen, eta horixe egin du. Zelai-erdiko bi hegalak eta aurreko biak oso azkarrak dira, baloirik gabe eta baloia oinetan dutela. Eta zelaiaren erdian jokatu duen Martins ere antzeko ezaugarrien jabe da.
• Kontraerasoaz gain, beste baliabide bat ere erakutsi dute kanpokoek: Athletic lerroak atzeratuta zegoenean, ondo mugitu dute baloia, eta nahikoa erraz hautsi dituzte etxekoen lerroak; gehienetan, baloia eramanez oinetan eta aurkaria buruz burukoan atzean utziz. Lehen zatiaren une batean azaldu dute baliabide hori. Orduan bakarrik egon da Athletic baloirik gabe, eta sufritu egin du.
• Opari handi samarra egin dio Athleticek Sportingi beraien gol bakarrean. Kornerraren aurreko jokaldian. Athleticek zeukan baloia atzealdean, baina nahastu, galdu, eta kornerra. Berdinketa.
• Llorente. Lehoien erresumako harresia. Gaindiezina. Kanoi, arku eta gezi. Dena izan da aurrelaria. Gora botatako baloiei etekina atera die (Susaetaren gola, partidako aurrenekoa, adibide, eta Ibai Gomezena, bigarrena, beste horrenbeste). Errematatu ez ezik, goleko paseak eman ditu. Portugaldarren amesgaizto. Eta neurketa itzela osatzeko, berak sartu du gol erabakigarria. Aizkorakada zehatza bezain zaila lehoien erresuma zapaldu nahi zutenentzat. Ia denborarik geratzen ez zenean.
• Erresumako besteak. Denak. Baina bat aipatzekotan: Ibai Gomez. Gola sartu, eta beste bat eman. Azken hilabeteetan bere bizitza osoan baino gehiago hazi da gaztea futbolari ofizioan. Beteranoa eta guzti ematen du eta.
• Bigarren zatian, Sporting atzerago aritu da. Bere zelaian izan da jokoa. Athleticen mesede. Lehen zatiko bizitasunik gabe, baina pixkanaka eta pazientzia handiagoaz, atzean sarrarazi du etxeko taldeak kanpokoa. Ondorio nagusia, hauxe: kontraerasoan aritzeko aukera gutxiago.
• Llorente-Susaeta lotura. Zortzi gol sartu dituzte bien arteko jokaldietan denboraldi osoan: Llorenteri sei pase eman dizkio Susaetak gola sartzeko, eta Susaetari bi Llorentek (gaurkoa bigarrena). Felix Iñurrategik zioen “bat ez da batera ere iristen, baina bi, bi eta erdi dira”. Susaeta eta Llorente.
• Finalean da Athletic. 35 urte geroago. Helmuga: Bukarest. Helburua: Europako Liga irabaztea lehen aldiz. Aurkaria: Atletico Madril. Bizkaiko ikasleek aspaldi sortutako Madrileko kluba. Eguna: maiatzaren 9a, asteazkena.

http://www.youtube.com/watch?v=7aqFzF6-_vI