Urteak daramatza taldeak eta selekzioak entrenatzen Marcelo Bielsak, eta biharkoa ez du aurreneko finala izango.  Lau dauzka jokatuta, dagoeneko. Eta datuen eta zenbakien gurpil zoroan murgilduta bizi garenez, eman egin behar estatistika: lau horietatik, bi irabazi ditu, eta bi galdu.

• 1. finala: 1990-1991 denboraldia. Newell’s-ek Clausura irabazi zuen 1990ean, eta Bocak Apertura. Bi garaileek finala jokatu zuten, bi partidetan banatuta, etxean eta kanpoan. Rosarion, Newell’s izan zen garaile; Berizzok sartu zuen gol bakarra. Hiru egunera jokatu zen itzulikoa, eta 1-0 galdu zuen Bielsaren taldeak. Baina penaltietan txapeldun izan zen.

• 2. finala: 1992an. Libertadores Kopa jokoan. Newells historiko haren aurkaria, beste historiko bat: Sao Paulo. Berriz ere finala bi partidetan banatuta. Rosarion, joanekoan, eta Sao Paulon, itzulikoan, emaitza bera: 1-0 etxekoaren alde. Brasilgo hirian, penalti jaurtiketetan zehaztu zen txapelketa: Sao Paulo txapeldun.

http://www.youtube.com/watch?v=ZevRODm50bU
• 3. finala: Amerikako Kopa, 2004an. Perun. Argentina eta Brasil aurrez aurre. 2-2 egin zuten, eta penaltiak epaile berriz ere. Penaltien aizkorakada zorrotzak bigarrenez jo zuen Bielsa. Brasil garaile.

• 4. finala: Olinpiar Jokoak, 2004. Atenas. Egun historikoa Argentinarentzat. 52 urteren buruan, urrezko domina irabaztea lortu zuen herrialdeak. Futbolak eta Bielsaren taldeak eman zion garaikur preziatua. 1-0 irabazi zuten.

Bihar bosgarren finala izango du Bielsak. Berdinketa hautsi egingo zaio. Onerako edo txarrerako. Irabazitakoen multzoa gizenduko du, edo galdutakoena.