Atzo Josu Urrutiak hitz egin zuen prentsaren aurrean. Hizpide izan zituenetatik, gai bat hartuko diot, aztertzeko (eta goraipatzeko) modukoa delako: Marcelo Bielsaren lanaz esan zuena.

• Balekotzat jo zuen Argentinakoaren lana. Baina ez zen emaitzetan oinarritu horretarako. “Taldea hazi egin da, eta horrekin nahikoa dugu bere lana ona dela ikusteko”.
• Ez dira ohiko adierazpenak. Egia da emaitzak onak izatean, erraza dela lana goraipatzea, eta emaitzek ikusmen argiena duena ere itsutu egiten dutela futbolean, onerako eta txarrerako. Baina aurreko puntuan jarri dudan bere adierazpena ezohikoa da. Nekez erreparatzen baitiote klubetako presidenteek lanari. Emaitzek agintzen dute. Txarrak badira, entrenatzailea kalera. Lana ona izanagatik ere. Eta emaitzak onak badira, lana txarra izanagatik (egundoko jokalari onak izanda, gerta daiteke azkeneko ekuazioa), kontratua berritzen diote.
• Urrutiaren hitzei segida emanez, aditzera eman zuen Bielsaren lanaren arabera hartuko dutela erabaki hau: kontratua luzatzeko aukera eskainiko diote. Denboraldiaren amaieran izango da azterketa egiteko unea, Bielsak hala eskatu ziolako Urrutiari.
• Atzo esan zituen hitzok Urrutiak, eta emaitza bikainekin ezin zuela besterik adierazi esango du baten batek. Baina Bielsaren lanarekin aspalditik dago gustura presidentea. Eta duela bost hilabete ere eskainiko ziokeen kontratua luzatzeko aukera.
• Futbolaren mundu erotu honetan, gustura entzuten dira Urrutiak atzo eginiko azterketa zentzudunak. Ikasi nahi duenak…