Ze eguraldi dago Athleticen erresuman? Eguzkia, eguzkia eta eguzkia. Luzerako eman du, gainera.

Horixe zen iragarpena duela hilabeteren bueltan. Europan bikain, eta Ligan ere dotore, Txapedunen Liga usainduz.

Baina gero, tarte txikian, atzeranzko pauso handia eman zuen Ligan, eta Europako lehiaketa preziatua urrunduz joan zen.

Betirako urrunduko zela ematen zuenean… laino arteko eguzkia atera da. Sei puntura dauka orain aukera. Hamabi daude jokoan. Aukerak egon badaude.

Gertuago egoteko, ezinbestekoa zuen irabaztea, eta gaur horixe egin du. Mallorca azpiratu du San Mamesen (1-0). Gola lehoien errege deitzen dioten horrek sartu du: Llorentek. 

Sentimenduz eta emozioz betetako arratsaldea izan da. Zelaian, Caparros itzuli da bere etxera, hain ondo gobernatu zuen etxera. Emozioa, eta esker ona, ondo merezitakoa.

Beste zirrara unea bortitzagoa izan da. Ertzainek hildako Iñigo Cabacas Athletic zalea izan du ardatz. Martxa egin dute zaleek bere omenez, eta gero, zelaian, minutuko isilunea izan da. Txalo zaparrada. Berak hainbeste maite zituen jokalariek beste omenaldi bat egin diote: Iñigo gogoan zaitugu lema idatzia zeukan elastikoa jantzita atera dira zelaira.

Llorentek gola sartu duenean, San Mamesen bildutako asko eta asko oroituko ziren Iñigo Cabacasekin. Zirraragarria. Baita neurketa amaitu denean ere.

Hiru puntuokin, Iñigok, dagoen lekuan dagoela, gertuago ikusten du Txapeldunen Liga.

http://www.youtube.com/watch?v=N6sHWa8FmzM