Lagunak jaitsieratik atera da
L’Estartit menderatu du (2-1), eta aurrea hartu dio sailkapenean. Athleticek ere irabazi egin du, San Gabrielen aurka (1-3), eta Reala galtzaile izan da Rayoren zelaian (2-0).
Arnasa hartu du Lagunakek. Atera egin da jaitsieratik. Hori lortzeko ezinbestekoa zuen L’Estartit menderatzea gaur, sailkapenean aurretik zuelako, eta bete du helburua (2-1).
Orain, sailkapenean, leku bat egin dute gora nafarrek, eta emakumezkoen Lehen Maila oraintxe bukatuko balitz, Lagunak ez litzateke jaitsiko. Zortzi partida baino ez dira falta Liga amaitzeko.
Athleticek ere irabazi egin du. Etxetik kanpo. San Gabrielen zelaian nagusitu da (1-3). Bigarren postuari eusten dio, eta handitu egin du Espanyol hirugarrenari ateratzen dion aldea; hamar puntukoa da orain, kataluniarrek berdindu egin dutelako.
Reala izan da galtzaile bakarra gure taldeen artean. Rayoren zelaian ez du alerik batu (2-0). Eta Atletico Madrilek aurreratu egin du sailkapenean.