Sartu lapiko batean Osasuna, Miguel Angel Lotina, Vila-real, talde ohia, jaitsiera eta Europa. Jarri sutan 90 minutuan, eta ea zer ateratzen den. Afaria, gaur gauerdi aldera, Vila-realen.

Zer jaki klase izango den batek daki. Baina jateko modukoa egongo dela, ez da dudarik. Vila-real edo Osasuna aseko den, hori jatorduan jakingo da. Edo, gerta daiteke biak goseak geratzea.

Sutan dago lapikoa, eta bertan elkartu dira izen asko. Propioak eta arruntak. Propioen artean, bi hartuko ditugu: Lotina eta Osasuna. Lotura bereziak uztartzen ditu. Taldeko entrenatzailea izan zen, eta berarekin igo zen Lehen Mailara azkenekoz, 1999-2000 denboraldian. Egungo jokalari multzotik, Patxi Puñalek bakarrik irauten du taldean, baina sasoi hartan ez zegoen Lotinaren aginduetara, Leganesen ari baitzen, utzita. Baina gertukoak dira.

Lotura horri tiraka, berezia izango da gaurko partida Lotinarentzat eta Osasunarentzat. Aspaldiko lagunak! Baina lehia tartean denean, lagunentzako lekurik ez da izaten. Biak daude irabazteko beharrean. Bueno, Lotina, beharrean bainoago, premian. Ez jaisteko lehian ari baita. Gaurko hiru puntuak beharrezkoak ditu.

Osasunak ere puntuak behar, ordea. Europarekin ametsetan segitzeko. Gaur galduz gero… Estimatzen du Osasunak Lotina, baina gaur irabazi egin behar dio entrenatzaile izandakoari. Aspaldiko eta zer moduz eta ondo eta halakoak, bai, baina lapikoa irakiten den bitartean, etsairik gogorrenen pare. Gero, jatorduan, izango dute elkar agurtzeko aukera.

Sukaldeko lanari dagokionez, albiste garrantzitsua: Raul Garcia sukaldari fina eta abila bueltan da, zigorra bete eta gero.