Lehiari dagokionez, ezer ez jokoan. Israelera joan behar, ordea. Bidaia deserosoa… eta partida ere bai. Baina joan egin behar, eta jokatu ere egin egin behar. Bihar etxean izango dira, eta horri heldu behar.

19:00etan da partida Hapoelen zelaian. Europako Ligako azken-aurreko jardunaldia da. Beste partida bat geratuko zaio Athletici, Sparta Pragaren aurka San Mamesen. Bietan egundokoa eginda ere, alferrik. Ez du sailkatzeko batere aukerarik.

Horregatik, Bielsak aukera hau baliatu nahi izan du, eta gaurko partidari etekinen bat ateratze aldera, jokalari gazte mordoa eraman ditu berarekin, Bilbao Athleticekoak eta Baskoniakoak. Batzuk hasieratik ariko dira. Horientzat da probetxugarria gaurkoa, Bielsari erakusteko baleko jokalariak direla. Lehen taldean ari direnentzat ere aukera izango da, gutxi jokatzen duten horientzat.

Baina hau ezin da saihestu: lehian ezer handirik jokoan ez badago, aspergarriak izaten dira partidak. Joka dezatela, eta etor daitezela azkar. Eta irabazten bada, hobe, beti baita hobea irabaztea.