Futbolaren muina da gola sartzea eta ez jasotzea. Helburu horiek gauzatzeko mila bide daude; motzak, luzeak, erdibidekoak, bien arteko nahasketak… mila. Baina azkenean, sartu egin behar da. Sartzen duena nagusi. Gaur, Koruñan, Deportivok sartu ditu bi gol, eta Osasunak alerik ere ez. Ez eman buelta gehiago gauzei.

Bidearen inguruan jarduteko garaia izango da orain. Garaileak bide motza hartu duela egundoko etekina ateratzeko, galtzaileak bide politagoa osatu duela alerik ez sartzeko… Kontuak kontu, sartzaileak hiru puntu, ez sartzaileak bat bera ere ez.

Ez da ondo hasi lehian Nafarroako taldea. Joan zen denboraldiko makina bat partidatan bezala. Baina gero, hasierako lo haize hori irauli, eta baloia txukun erabiliz, itxuraz aritu da Osasuna. Baina jo gabe, sartu gabe… Bien bitartean, Deportivo bere lanera: ahalik eta ondoen defendatu eta kontraerasoa bota.

Horretan ziren gauzak, Rikik lehen gola sartu duenean. Bigarren zatiaren hasieran izan da. Hortik aurrerakoa, lehenagoko pelikula bera, baina argitasun handiagoarekin. Osasuna baloiaren jabe, Deportivo zain. Izan ditu aukera batzuk Jose Luis Mendilibarren taldeak, baina asmatu ez. Gero, bukaeran, Osasuna maldan behera ari zenean berdindu nahian, Nelson Oliveirak bigarrena egin du.

Kito. Gaurkoak egin du. Hurrengoan pentsatzera. Itxura ona aski ez dela barneratuta.