Reala eta Osasuna gaur gauean, Anoetan (21:30). Euskal Herriko derbia. Nafarroako derbia.

Hiru puntu jokoan, eta bi taldeak hiruko uztaren bila. Bakoitza bere bidetik. Bide ezberdinak.

Realak artisten aldeko apustua egin du azkenaldian. Ruben Pardo eta Illarramendi buru, oinarri eta zutabe. Hortik abiatzen dira besteak, beraien aurrekoak. Baloia sarriago edukitzen ari dira aurreko horiek, eta baloia dutenez maitale leial, txoratzen dabiltza. Baloia beharko du Realak, baina baloirik gabe ere lan ona egiten badu, oso arriskutsua da kontraerasoan.

Konfiantzaz daude jokalariak, eta hori ere kontuan hartzekoa da. Montanierrek esan zuen atzo partida lotua espero duela, ez dela Rayoren aurkakoa bezain erraza izango. Mendilibarrek arrazoia eman zion A15aren bestaldetik: “Reala hain erraz joka ez dezan saiatuko gara. Ez dut nahi izatea Rayoren aurkakoa bezain lehia irekia”.

Estua, lotua, zaila… Horretara joango da Osasuna. Baliabide taktikoez gain, ikusten ez den futbola esaten zaion hori erabiltzen saiatuko da (epailearen borondatearen araberakoa izango da erabilera).

Pazientzia, lasaitasuna… Realaren hiztegiak gorriz markatuta izan beharko dituen hitzak… baldin eta Osasunaren iragarpenak betetzen badira. Aldaketak iragarri zituen Montanierrek atzo gaurko: “Bizpahiru”, esan zuen. Zurutuza eta Griezmann izan daitezke sarituak; noren ordez? Xabi Prieto eta Chory Castroren partez? Auskalo!

Bat aurkaria jotzera, bestea kolpeak ez jasotzera. Ekimena Realak, eta Osasuna xomorroarena egitera? Baliteke. Asko dute jokoan: Realak irabaziz gero, Ligako jauregi argiztatuan sartuko litzateke; Osasuna garaile bada, armiarma sareez gainezka dagoen gela ilunetik ospa egingo luke, ziurrenik.

Anoetan ikusi beharrekoa ikusteko irrikaz. Iragarritako kontu denak beteko al dira? Edo hasi orduko, jokaldiren batean bataren edo bestearen iragarpenak hankaz gora joango dira? Futbola, futbola da (Boskov).