Lau jardunaldi baino ez dituzte jokatu Espainiako ligan, eta futbolari batek duela urte batzuk esan zuen bezala, “azterketak denboraldiaren amaieran egin behar dira”. A ze arrazoi potoloa! Horregatik, goiz da ondoriok ateratzeko, goizegi.

Athletic, Osasuna eta Reala hizpide hartuta, beste arrazoi bat ere bada orain gehiegi ez hitz egiteko, eta ondorio sakonak ateratzea gehiegi hitz egitea bada ere, helduleku sendorik ez dute hirurek. Egiten ari den jakia bezala daude, labean sartuta baina osatu gabe.

Athletic ez dabil sendo. Sendotasun bila doa. Bidea egiten ari da. Atzealdean zuloak ikusten direla, ados. Beste hainbat gauza ere hobetu behar dituela, bai. Baina hasierakora joanda, laugarren jardunaldia baino ez da.  Bidea egite horretan, lau puntu dauzka, azken bi partidetan ez du galdu, eta atzo, emaitza berdintzeko gai izan zen. Eta Llorentek jokatu zuen, eta gola sartu.

Osasunarena tentu handiz jarri beharrekoa da, emaitzari bakarrik erreparatzeko arriskua handia baita, oso txarrak direlako. Lehen puntua igandean atera zuen. Hamabitik bakarra. Hori ona ez dela ezin da ukatu, baina azterketak ezin dira horretara mugatu. Jakina puntuak direla funtsa, baina orain arteko ibilian gauza onak ere izan dira. Horietako bat da Kike Solak gola sartu izana atzo. Horri heldu behar zaio, eta puntuak batzen hasi, atzean geratzea txarra izango litzatekeelako.

Realaren inguruan, asko entzuten dena: puntu gehitxo duela erakutsi duen jokorako. Ez dabilela ondo jokatzen, igandekoa kasu. Baina halakoetan, irabaztea garrantzitsua da. Osasunaren beste muturrean jar daiteke: gutxiago jokatu, baina puntuak batu. Motorra martxan jartzen ari den itxura ematen du. Bitarte horretan, datu on hau: etxeko bi partidak irabazi ditu.

Bukatzeko, hasierakora: ondoriorik ez atera, heltzeko ezer gutxi dago eta, goizegi delako.