Europa osasuntsuago egoteko aukera gero eta gertuago dago. Datorren denboraldian bertan izan daiteke. Horretaz ari dira hizketan Osasunaren inguruan. Atzo, Espanyoli irabazi eta gero, indartu egin du hautagaitza, eta gaur-biharko beste emaitzen esperoan, primarien tankera har dezake Europan lekua gordetzeko prozesuak. Zenbait talde borrokatik apartatzeko arriskuan daude eta.

Baina atzokoari bakarrik erreparatuz, ondorio hau nabarmendu nahi dugu hemen: Osasuna eroso moldatzen da Espanyol bezalako aurkariekin. Goazen kataluniarren ezaugarri nagusia zein den azaltzera: joko ez zuzena egiten dute; hau da, baloia zelaiaren gainetik erabiltzea gustatzen zaie, jokalariak pase motzen bidez lotuz.

Harrapakin gozoa du Sadar zaharreko harrapariak halako moldean aritzen den taldea. Espanyol atzo jan zuen; Athletic duela hilabete pasatxo; Bartzelona lehenxeago.

Harrapariak harrapakina identifikatuta dauka. Badaki zein jan nahi duen. Gero, bere bila abiatzen da, besteak zer egingo duen begira egon gabe. Bere ezaugarriekin ehizatzen du, bere baliabideekin. Joko ez zuzenari joko zuzena bota, eta pozoiaren ondorioen parekoak nozitzen dituzte harrapakinek.

Beste harrapariak hor ibiltzen dira harrapakinari begira, hark zer egingo. Akzioa lehendabizi, eta erreakzioa gero. Osasunak ez, Osasuna bera hasten da akzioarekin, eta erreakzioa egin dezala harrapakinak. Duela hilabete edo, entrenatzaile batek esana da hau: “Bartzelonari irabazteko joko zuzena erabili behar da”. Osasunarena, adibidez.

http://www.youtube.com/watch?v=uJb7zjCgD6c