Beharra duten bi talde izango dira parez pare gaur arratsaldean (16:00): Zaragoza eta Athletic. Baina zer behar ezberdin! Muturretik muturrera dagoen aldea dago bi beharren artean.

Zaragoza itotzeko zorian da. Maila galtzeko ez zaio asko falta. Gaur, zaleen aurrean, irabazi egin behar du aukerei eusteko. Gosea.

Athletic pozez txoratzen dabil. Bi final begien bistan, eta Ligan, Txapeldunen Ligako ametsa gertu. Gaur, hiru puntuak atera behar ditu ametsetan segitzeko. Jateko gogoa.

Bietako nor nagusituko den? Batek daki. Sailkapenak ez du gezurrik esaten, eta Athletic da faboritoa. Baina hain behartua egonik etxeko taldea, edozer gerta daiteke.

Hori bai, hau oso garbi dago: Marcelo Bielsarenek dakiten bezala jokatzen badute, alferrik izango da etxekoen behar gorria. Jateko gogoa nagusituko zaio goseari.

Ahaztu aurretik: zuri-gorriek golak sartzen asmatu behar dute. Aukerak sortuko dituztela jakina baita. Asmatu eta irabazi. Gaurko uztartze egokia.