Da multzoko bi partida hauekin amaituko du bigarren jardunaldia:

• Ukraina-Frantzia (18:00, Donetsk, Cuatro)
• Suedia-Ingalaterra (20:45, Kiev, Tele 5)

Ukraina-Frantzia

• Erakargarria aldez aurretik. Ukrainak hiru puntu dauzkalako, eta Frantziak bakarra. Ukrainak oso azkar jokatzen duelako, eta Frantziak joan zen egunean baino azkarrago jokatu beharko duelako.
• Laurent Blancen buruan sartuz gero, gaurko ekuazioa erraza da: ondo defendatu, baloia lapurtu, eta ukrainarren ausardia zigortu kontraerasoan.
• Oleg Blokinen buruan ibiliz gero, ekuazioa ez da hain sinplea: lehengoan bezala jokatu, bizi, azkar eta erasoan jokalari asko pilatuz, ala Frantziari utzi ekimena, atzerago defendatu, eta kontraerasoan atera?
• Zelai-erditik aurrera oso jokalari onak ditu etxeko taldeak. Ez da Xevxenko bakarrik; Nazarenko, Voronin, Konoplianka eta Yarmolenko ere ale ederrak dira. Frantziak ere gaitasun handia dauka aurrealdean: Benzema, Nasri eta Ribery. Arriskua handia izango da bi areatan.
• Atzeko lana egiteko fidagarriagoa ematen du Frantziak, sendoagoa. Baina Ukraina gai da sendotasun hori hausteko, erasoan abilak ez ezik, mugikortasun handikoak direlako jokalariak. Erritmo biziak astoratu egin dezake lasaiena ere, eta erne ibili beharko du Frantziak horrekin.

Suedia-Ingalaterra

• Multzoko bi tren astunak. Makalagatik, ez indartsuenak izateagatik. Eta makalaren adiera txarrean ez: makala=geldoa. Kosta egiten zaie. Ikusi zen lehen partidan, eta horren araberakoa da makaltasunarena.
• Roy Hodgsonek argi esan du: “Kontraerasoko aukerei errentagarritasuna atera behar diegu”. Ez daukala baloia atzetik atera eta gora joateko gaitasuna. Defendatu eta azkar atera. Horra ingelesen jokoa. Ez du beste ezertarako astirik eduki entrenatzaileak, oraintxe hartu baitu selekzioaren ardura.
• Suediak zer? Beste urteetan baino erasokorragoa da, eta hobeto moldatzen da baloia oinetan erabiltzen. Baina beste zerbait falta zaio. Asko.
• Ez du ematen lehia irekia izango denik, baina emaitzak baldintzatuko du hori. Ingalaterrak puntua dauka, Suediak batere ez. Beste partidako emaitza ere kontuan hartu beharko dute.