Estu baino estuago hartu du Osasunak Bartzelona gaur iluntzean Sadar zaharrean, baina hiru puntuak ihesi joan dira. Partida ona jokatu dute etxekoek, baina saririk ez.
Lehen gola etxekoena izan da, baina gero bi jaso ditu.
Joseba Llorentek sartu du gola, Messik beste biak.
Osasunak jokalari bat gutxiagorekin jokatu du 1-1ekoaren ondoren (75. min), Puñal kalera bota duelako epaileak.

Horra neurketako datuak. Hotzak. Edo epelak.
Sakontasun handiagoarekin jardunda, hauek kontuak: baleko partida egin du Osasunak, eta ez da gutxi aurkaria zein izan den ikusita. Itxura ona eman du Jose Luis Mendilibarren taldeak, aurreko asteburuko partidan bezala. Zaleak konforme antzean joan ote dira etxera?

Bartzelonak dena baldintzatzen du. Neurketan zehar, jokoa. Eta ondorenean, azterketa guztiak. Ia beti irabazten die denei, eta galtzeko moduari erreperatzen diote aurkarien inguruan, baleko neurketa izan den edo ez aztertzeko. Horri begiratuta, Osasuna gustura egoteko moduan da. Baina azterketa horiek zenbat balio dute? Azken batean, galtzea beti da galtzea. Egia da moduak eta moduak daudela, baina uzta bera izaten da: zero puntu.

Aurrera begira, hobe galdu egin dela nabarmentzea, itxura onaren helduleku ez beti indartsuari lotu ordez. Bi neurketa, bietan itxura ona, baina puntuak, zero.