Futbolean ADN-a oso garrantzitsua da. Bada klub baten izaera azaltzen duen estereotipoa, topikoarekin zerikusirik ez duena. ADN-az ari garelarik beti etortzen zait gogora Juventus, zuri-beltzean, beti irudikatzen dut Manchester United bere elastiko gorriarekin, edota Bartzelona, laranjaz margotuta. Juventus altzairua bezalakoa ikusi izan dut beti, gogorra, astuna batzuetan, baina sekula herdoiltzen ez dena. Manchester United haize bolada bortitza da; Bartzelonak tulipa lorearen esentzia du, eta areago joanez gero, Atletico Madril da kontraerasoaren ispilua…

Arima eta bihotza ezinbestekoak dira futbolean. Gorputza beste kontu bat da. Arimak eta bihotzak nortasuna ematen diote talde bati eta hori berezkoa izaten da. Koloreen sakontasuna. Historia.

Eibarrek grina pizten du. Ipuruan sartzea futbola besarkatzea da. ADN ezaguna berdegunean. Eibarren elastikoa jantzi duen orok etena egiten du bere futbol ibilbideari buruz hausnarketa egiterakoan: iraganak eta ondorenak ez dute zerikusirik Ipuruatik igaro ondoren. Hala aitortu zigun David Silvak 2008ko udan, Eurokopako finala jokatu aurretik: “Eibarren urtebete jokatzea oso mesedegarria izan zen niretzat. Gogortu ninduen. Zaildu”.

Muturreraino lehiatzeko grina horren testuinguruan ulertu behar da talde armaginaren denboraldi bikaina. Beti lehiarako prest. Arima eta gorputzez. Futbolean topiko gehiegi daude, horietako bat oso zaharra da eta hemendik kanpo hedatuta dago: “Eibar, futbol zelai estu batean jokatzen duen talde gogorra. Joko zuzena egiten du, oso fisikoa. Jokamolde britaniarra”. Baina Erresuma Batuan, gaur egun, ez dago estereotipotzat jo daitekeen jokamolderik. Garai bateko kick and rush delakoa historia liburuetan geratu da, salbuespenak-salbuespen. Eibar, antzinako Wimbledon bailitzan!

Aitzitik, jokoak eman dio Eibarri onenen artean egoteko aukera. Koherentziaz lan egitearen garrantzia azpimarratu beharra dago. Hankak lurrean eta talde espirituari segida emanda, igoera gauzatu zuen oinarriarekin. Klubaren bihotza eta arima ondo irudikatzen du ontziko lemazainak. Gaizka Garitano taldeko kapitain eta ardatza izan zen aspaldi, armaginen urterik oparoenetan. Ipuruan eskarmentua lortu zuten, besteak beste, Gorka Iraizozek, Moises Hurtadok, David Silvak, Joseba Llorentek… Lehen mailara igotzeko zorian izan ziren, eta gerora Europako txapelketak jokatu dituzte beste taldeekin.

Eibar egitasmo argi baten ondorioa da. Lehiatzeko grinak finkatzen du beti helburua. Talde sendoa osatuta, defentsa lanean irmo, elkarri lagunduz, ibilbide oparoa egin dute armaginek Bigarren mailako olatuaren puntaraino iritsi arte. Zilarrezko mailara igotzeko, besteak beste, diruz apaindutako Oviedo azpiratu zuten. Ikasgai ederra hartu zuen futbolak.

Jokalariek elkarri eskutik helduta jokatzen dute. Bat eginda. Estutu, baloia berreskuratu, eraiki, atea zulatu, denek elkarrekin egiten dute. Taldearen izana, izenen gainetik. Denen ahotan daude Realak utzitako hiru mutilak (Yuri, Dani Garcia, Alain Eizmendi), fitxaketen ekarpen bikaina (Raul Navas, Raul Albentosa, J Peleteiro, Jose Luis Morales, Urko Vera…), baina entrenatzailearekin batera, zelaian armaginen ikurra direnek erakutsi dute bidea: Xabi Iruretak, Txema Añibarrok, Mikel Arruabarrenak…

Sasoi hasieran gola falta zen, eta halako batean guztien laguntzarekin iritsi dira golak. Min hartutakoak eta zigortuak asko izan dira, baina haien ordezkoek taldearen lehiakortasunari eutsi diote. Fran Garagarza kirol arloko arduradunak joan zen astean azpimarratu zuen bezala: “Hemen gauza guztiak, onerako eta txarrerako, talde-lanaren ondorio dira”. Eta hainbat gauzetan eredugarria den kluba ataka batean da orain, futbol profesionalaren legedi ankerraren ondorioz. Kapitala gehitzera behartu dute. Eibarrek 1,7 milioi euro bildu beharko ditu ondorengo hilabeteotan maila galdu nahi ez badu. Guadalajarari gertatu zitzaion joan zen denboraldian. Mirandes eta Alcorcon, ostera, onik atera ziren, ozta-ozta. Etxeko lanak ondo eginda, 100 milioi eurotik gorako zorra duten aurkariekin lehiatzera kondenaturik daude armaginak. Horietako batek, Deportivok, zorrez josita, bost fitxaketa egin ditu neguko merkatuan! Bidegabekeria horiengatik soilik, igoeraren saria mereziko luke futbolaren esentziaz bizi den klubak.