Bi ezustek elkar ikusiko dute bihar Valentzian. Nor ezusteago izan ariko dira lehian Levante eta Osasuna (16:00). Laugarren doa etxeko taldea, eta zazpigarren nafarrak. Lau puntu gehiago dauzka Levantek.

Ligaren hasieran, bazter guztietan izaten da jolasa, talde bakoitza ze lekutan ibil daitekeen asmatu nahian. Jolasa baino ez da. Nekez egongo da bi talde horien lekua asmatuko zuenik. Denen ustean egongo zen ez jaisteko borrokan ibiliko zirela. Baina futbolean gauzak ondo egiten dituztenek saria izaten dute, eta Levantek eta Osasunak ondo baino hobeto irabazi dute berea.

Levantek gainditu du 43 puntuko muga, jaitsiera ziurtatzen duena. Eta Osasunari hiru puntu baino ez zaizkio falta.

Partida bera hizpide hartuta, nondik nora joan daitekeen aztertzen hasita, oso argi eduki behar du Osasunak zein den Levanteren indarra: kontraerasoa. Asteazkenean ondo erakutsi zuen Anoetan. Baliabide hori ez erabiltzea lortu behar dute Mendilibarrenek. Lege nagusia da erasoan baloiak ez oparitzea. Baina opariak egin egiten dira, inor ez delako perfektua. Horregatik, opariaren atzetik edo presionatu edo lerroak azkar atzeratu behar ditu Osasunak. Eta jakina, Osasuna bera erasoan dela, ondo zaindu Levanteren erasoko jokalariak. Kone, adibidez.

Bestelakoan, Osasunak etxeko itxura ematera atera behar du. Horixe eskatzen zaio taldeari, baina ez da erraza.

Deialdian, hiru aldaketa daude asteartetik: Sergio, Lolo eta Raoul sartu dira, Ruben, Annunziata eta txartelak pilatuta dituen Nekunamen ordez.

Lehen itzulian, Osasunak irabazi zuen (2-0). Bideo honetan dituzue golak:

http://www.youtube.com/watch?v=rQhp43rQ3rY