Futbolari batzuen ibilbidea herriz herriz zizelkatzen joaten da. Leku askotan jokatu izan dutelako. Hasten dira bueltaka, eta bueltaka segitzen dute. Futboleko nomadak dira.

Urko Pardo da horietako bat. Ibilbide anitz horretan eragina izango du, akaso, bere jatorri anitzak. Izan ere, Belgikan jaioa da duela 28 urte. Baina ez ama, ez aita ez ditu hangoak. Aita euskal herritarra du, ama galiziarra. Eta bera belgikarra. Jaio orduko, hiru lekurekin lotuta.

Gero, futbolean jokatzen hasi zenean, leku gehiago ezagutzen hasi zen, eta horretan segitzen du. Anderlechten ekin zion, gazte mailako taldean. Kataluniara jo zuen ondoren, eta Bartzelonan ibili zen, harrobian. 2002tik 2007ra izan zen, baina azken bi denboraldiak utzita egin zituen Cartagenan eta Sabadellen, hurrenez hurren.

Goiko taldeko ateak ez zituen ireki atezainak, eta beste bidaia bati ekin zion. Greziara. Iraklisen jokatu zuen sasoi batez, baina hurrengoan, 2008-2009an, maletak egin eta Errumania aukeratu zuen. Rapid Bukaresten aritu zen lehen denboraldian, eta bigarrenaren zati batean ere bai, baina berriz Greziara joan zen, utzita. Olympiakosen jokatzera. 2009-2010ean izan zen hori. Lan ona egin zuen Atenasen, eta fitxatu egin zuten. Ernesto Valverderen aginduetara egon zen, hortaz, aurreko sasoian. Eta orain, bidaiaren beste geldialdi batean, Apoelen ari da.

Ez du hasieratik jokatzen, eta aulkitik ikusi beharko du Real Madrilen arteko partida, Txapeldunen Ligako final-laurdenetako partida historikoa. Joanekoa izango da, eta ziprearrek beste ezuste bat eman nahi dute (20:45).