Futbolean talde bakoitzeko helburu bat egoten da. Bakoitzak berea. Gaur, Sevillan, muturreko bi helbururen bila ariko dira Betis eta Osasuna. Etxekoek ez jaistea dute asmotzat; gureek Europara joatea.

Liga berean izaten diren ezberdintasunak azaltzeko partida da gaurkoa. Lehia, azken batean. Lehiaren funtsa. Baina askotan uste denaren aurka, Osasunak ez du hanka batekin irabaziko partida, Betisen helburua apalagoa delako; hau da, sailkapenean beherago dagoelako.

Lehiaren beste funtsetako bat horixe da, hain zuzen. Edozeinek edozeini irabazteko aukera egoten da, Liga honetan Real Madril eta Bartzelona aparte lagaz gero.

Horren jakitun edo, Jose Luis Mendilibarrek mezu argia bota zien jokalariei, prentsaren aurreko agerraldia baliatuz: “Betis oso ondo ariko da futbolean jokatzen, baina Europara sartzeko aukera guk daukagu jokoan”. Harrokeriatzat hartu dute Sevilla aldean esan hori, baina taldeari botatako mezutik dauka gehiago.

Europako lekuari eusteko, lehenik eta behin, Osasunak defentsako lan ona egin beharko du, Betis abila baita erasoko jokoan. Horretan oinarritu behar du emaitza ona lortu nahi badu. Eta erasoan gauzak onda egitea ere funtsezkoa izango da, aurkariaren hutsak ondo baliatzen dituelako Betisek kontraerasoan aritzeko.

Bi hitzetan esanda: partida osoa egin beharko dute nafarrek. Ez du ematen gutxirekin asko ateratzeko moduko neurketa izango denik.

Lehen itzulian, Osasunak irabazi zuen (2-1). Hemen, golak:

http://www.youtube.com/watch?v=2V00X_caZ_k