Alavesek ere badu entrenatzailea datorren denboraldirako: Nacho Gonzalez. Etxekoa eta gasteiztarra.

45 urte dauzka, eta Ariznabarran hasi zen entrenatzaile lanetan. 1994-1995 denboraldian, Alavesen sartu zen, eta bederatzi denboralditan egon zen. Gazte mailan, Hirugarren Mailan, eta lehen taldean jardun zuen lan ezberdinetan (98-99 sasoian 2.B Mailatik igo zen).

Gero, Kataluniara joan zen, Reus Esportiura. Lau denboraldiz jardun zuen han, eta bigarren sasoian 2.B Mailara igo zen. Azken denboraldiak Sant Andreun egin zituen, emaitza onekin, gainera. Aurrenekoan 2.B Mailara igo zen, eta bigarrenean, 2. Mailara igotzeko kanporaketa jokatu zuen. Hurrengoan, Liga irabazi zuen, eta kanporaketa jokatu berriz ere. Laugarren sasoian zazpigarren izan zen Sant Andreu. Denboraldi honetan ez du talderik entrenatu.