Interesgarri aurkezten da larunbatean Lezaman jokatuko den lehia. Bilbao Athletic Zubietako harrobiaren aurka. Bi filosofía desberdin, helburu berarekin. Lehen taldea ahalik eta hobekin asetzea dute xede eta emaitzak lagun badituzte, hainbat hobeto. Egoera desberdinak bizitu eta gorpuzkerak antzeko izan ez arren, argizpi asko ari dira eskaintzen zuri-gorri eta txuri-urdinak.

Zigandaren mutilak uraparretan daude. Iragan jardunaldian Huescaren aurka 3-0 galtzeak min egin arren, sailkapenean ondo eurenganatua daukaten bigarren postuak balio handia dauka. Las Palmas Atletico soilik dago bizkaitarren aurretik. 3.denboraldia du aurtengoa Zigandak Lezaman, eta hiruek elkarrekin zerikusirik izan arren, aurtengoan ere gauzak fin ari da egiten Larraintzago entrenatzailea. Hasiera-hasieratik argi zeukan atzeak sortuko zizkiola burukomin gehien. Atea Gorka Magunazelaia eta Kepa Arrizabalagarekin ondo babestua dauka. Erdialdean Ager Aketxe eta Unai Lopez magia sortzaile burutsuak dira. Ardura handia hartzeko gai eta aurkarien haustura egile. Hegaletan, Sabin Merinok eta Iker Guarrotxenak egoki egiten dute aztoratze lana. Gol askoren iturria da hegala Lezaman eta sartu ere dezente egiten dituzte. Aurrean berriz, Valverdek gogoko duen Gillermo bertan da. Mario Barcoren parte-hartzea garrantzitsuagoa da eta Iñaki Williamsen aukera ere hor dago.

Atzea da aurkariei erraztasun gehien emanten dien txokoa. Ez gauzak gaizki egiten dituztelako, ez gaizki lantzen dutelako arbeleko puntu hori. Esperientzia oinarri garrantsitsua da 2.B mailan eta askok Baskoniatik etorri berri, partiduak behar dituzte minutuak egin eta konfiantza berenganatzeko. Unai Bustintzak, Jon Gartziak lan eskerga izan dute lehen itzulian baina asteak aurrera joan eta jardunaldiak etorri ahala, kezka lasaigune ari da bihurtzen Lezamako laborategian. Golak erraz sartzen dituzte eta eurei egitea jada ez da kurtso hasieran bezain lan erosoa. Ziganda “kukuak” beste buelta bat eman dio egoerari eta Eizmendi, Saborit, Moran, Peña edota Eraso gabe geratu arren, egoera irauli egin du eta berriro ere albiste onen iturri dira. Orain urte batzuetako egoerarekin alderatuta, jendea ez da Lezamara joaten etorkizu hurbilean San Mamesen distira berezia egin dezaketen jokalariak ikustera. Futbolzalea asko asetzen du Zigandaren taldeak eta jende askoren ezinbesteko zita bilakatu da harrobiko taldearen partida.

Sanse

Aurrean onbidean murgildua den Asier Santanak gidatutako taldea edukiko dute zuri-gorriek. Azken urteetan bezala, interes puntu handiak plazaratuagatik Sanseri joera positiboari lotua jarraitzea falta zaio. Alegia, asko kostatzen zaio emaitza on asko jarraian lortzea. Denboraldi guztian 2 partida bakarrik irabazi ditu segidan.

Joseba Zalduak, Marco Sangallik eta Jon Gaztañagak lehen taldearekin duten lotura hertsiak horretan badu zerikusia, baita Sansek bere daukan batazbesteko adin baxua. Gazteak nagusi dira eta esperientzia gabezia batzuetan nabari. Partidak aztertzen hasita dena den, arazoa ez da gola hartzean. Ez da erraza golak sartzea eurei, aldiz egiterakoan kamuts dabiltza. 24 gol egin dituzte eta hartu berriz, 26. Iker Hernandezek 24 horietatik 9 egin ditu eta beste gol askotan hartu du parte aurrelari donostiarrak. Bere aportazioa beraz, ezinbestekoa harrobiko taldearen sailkapeneko egoerarako.

Asier Santanak dena den oso argi dauzka gauzak, eta bere ideia behar bezala plazaratzerakoan, garaipena ez da urrun izaten. Bilbao Athletic-en aurka jokaturiko lehen itzuliko partidan, Sansen partida serioa eta egokia egin zuen. Nortasunez utzi zituzten une askoan zuri-gorriak mendean eta atzeko sendotasuna aurrera eramaten ahalegindu ziren. Dena den aukerak sobera izanagatik ez zuten jokaldirik borobiltzen asmatu eta Zigandarenek sortutako aukera apurretako bati ondo atera zien zukua. Sabin Merinoren lasterkadi sigi-sagatsuari amaiera oso ona eman zion Unai Lopez oreretarrak.

Sanse une hauetan 13.postuan da, jaitsiera postuetatik 6 puntura. Bilbao Athletic berriz 2. tokian da, bizkaitarrek 13 puntu kentzen dizkiete gipuzkoarrei. Hori izango da larunbateko lehiari begira egon daitekeen alde bakarra. 90 minutuk askorako eman dezakete eta horrelako partida batean zer esanik ere ez. Zigandarenek euren gotorlekuari probetxua ateratzen jarraitu nahi dute, gainera euren esku dago liga lehen postuan amaitzea eta Realari irabaztea pizgarri garrantzitsu izan daiteke. Sansek Toledo izpirituari eman nahi dio bide, nortasunez jokatu eta aurkaria estu hartzea. Gauzak honela beraz, zail da apustu argia talde baten alde egitea. Arratsaldeko 17:00etik aurrera ikustekoa izango da ETB1n. Etorkizuneko jokalariak, oraingo bi futbol estilori gorazarren egiten. Ongi aztertu eta gozatzeko zita berezi horietakoa.