Gola sartzen ez asmatzea zer den… Erraza behar zuena zaildu egin zaio Realari. Irabazi irabazi dio Celtari (2-1), baina estutasun handirik gabe lortuko zuen zutoinetara eta langara hainbat jaurtiketa egin izan ez balitu.

Hiruzpalau aldiz laztandu ditu baloiak ateko leku horiek. Lehen zatian, hutsean zenean dema. Sartu izan balira… Baina sartu ez, eta halakoetan askotan gertatzen dena gertatu da Anoetan: aurkariak hartu du aurrea.

Bigarren zatiaren hastapenetan, De Lucasek egin du lan hori. Maldan behera behar lukeena maldan gora jarri zaio, baina Agirretxe bizi ibili da, golegilea dela erakutsi eta bi gol sartzeko. Batean, Griezmannen jokaldi bikaina dotore bukatuz, eta bestean, Velaren borrokari etekina ateraz. Bi gol eta hiru puntu.

Hau esatea erraza da, egiten zaila, ordea: atearen aurrean eraginkorrago izan behar du Realak. Partidaren jabe egiten denean, aukerak sortzeko erraztasuna dauka, eta baliatu egin behar du.

Gero, betiko eztabaida: aurretik jarri denean, Celta izan da nagusi ala Reala atzeratu da? Bat izan ala bestea izan, estu egon da emaitza, eta ez zukeen hala behar. Ez asmatzearen ajea izaten da. Hain erraza balitz…