Erantzun beharreko galderak
Realak Lehen Mailan jarraituko du, Racing menderatu eta gero (3-0). Orain, geroan pentsatzeko garaia da, eta ez klubaren barruan bakarrik. Inguru osoak egin behar du azterketa sakona.
- Realak lortu du denboraldi honetarako jarri zuen helburua: datorren denboraldian ere Lehen Mailan izango da. Eta hiru partidaren falta lortu du. Balioa eman behar zaio horri, eta ez balioa kendu atzeko hirurak inoizko txarrenak izan direla argudiatuz. Hain zaila al da besteei begiratu gabe nork berea aztertzea?
- Gaurko partidaz, aipamen txikia. Bi zati izan ditu. Lehenengoan, parekatua izan da, Realak erasoan ez duelako zulorik aurkitu, eta gehiegi jokatu duelako barrutik, kanpoaldetik aritu beharrean. Zulorik ez aurkitzearen eragile bat, hauxe: baloiaren aurreko jokalariak ez dira asko mugitu, zuloak sortzeko, eta baloiaren jabe zenari laguntza emateko. Bigarren zatian, lehen gola sartu ondotik (Griezmann), ondo baliatu ditu Realak Racingek utzitako zuloak. Hortik sortu eta gauzatu dira beste bi golak (Griezmannek berriz eta Agirretxek).
- Gaur baino hobeto jokatu izan du Realak Anoetan sasoi honetan. Horregatik azaldu al dira txistulariak lehen zatian bertan?
- Txistulariena beste gauza askoren ondorioa da. Zergatik ez daude hainbat zale gustura denboraldi honekin? Beraiek erantzun beharko dute, baina erantzun horiek sakonak direneko susmoa daukat.
- Ezinegona Philippe Montanierren inguruan hasi zen, eta hori du sorburua. Garbi esanda, kritikoek esaten dute ez duela mailarik Lehen Mailan entrenatzeko. Horrekin lotuta, beste galdera bat: hainbat kazetarik egurtu egiten dute Montanier, eta horrek eragina al du zaleen haserreengan (eta beren iritzian)?
- Ezinegon hori itzaltzen ez du lagundu klubak. Nola esan dezake Aperribai presidenteak publikoki entrenatzaileak gaizki kudeatzen dituela partidak? Nola utzi dezake erantzun gabe entrenatzailearen geroaz egindako galdera bat? Zalantzak piztu eta puztu egin dituzte halako jarrerek.
- Montanierrek, beste entrenatzaile guztiek bezala, asmatu egiten du eta hanka sartzen du. Gauza batzuk leporatzen zaizkion bezala, aurreko denei ere leporatzen zitzaien zerbait, eta ondorengoei ere bai. Zer esan nahi du horrek? Ez al litzaieke beste begi batzuekin eta beste pentsamolde batekin begiratu beharko entrenatzaileei?
- Klubak erabaki beharko du zer egin Montanierrekin. Berarekin taldeak gauza on batzuk dauzka, nire ustez, eta beste batzuk ez hain onak. Baina gauza bera esaten nuen aurrekoez ere: denekin izan ditu taldeak gauza onak eta ez hain onak. Baina ona eta ez hain ona erabat subjektiboa da, nork eta nola begiratzen duen. Klubari dagokio azterketa zailena egitea: subjektiboa ahalik eta objektiboen bihurtzea, eta horretan oinarrituz, galdera honi erantzun behar dio: Montanierrekin taldeak egiten dituen gauza onak nahikoa izango al dira datorren denboraldirako klubak jarriko duen helburua (edozein dela ere) betetzeko?
- Zaleek ere erantzun behar dituzte galderak: zer nahi dute? Nola? Noiz? Irudipena daukat giro aldrebes honen antzekoak pairatu izan dituela Realak bere osotasunean denbora asko ez dela. Horretan zela, Bigarren Mailara jaitsi zen, eta igo ondoren, zaleek eta inguruak ikasgaia ikasi zutela esan zen; hau da, ikasi zutela gauzei balioa ematen. Bistan da ezetz. Lehen Mailan jarraitzeak egundoko balioa dauka, eta gainera, etxeko jokalariekin. Gero, beste helburu batzuk jarri behar direla? Ados. Baina lehendabizi oinarrizkoa lotu behar da.