Betiko esaldi batekin izendatu dugu gaurko derbia (San Mames, 18:00), edozer gauza gerta daitekeelako… zelaian eta zelaitik kanpo. Zelaikoa Athletici eta Osasunari dagokie, eta epaileak lehiaren amaiera adieraztean bukatuko da. Irekia dago neurketa, ez da aurreikusten zeinek izan dezakeen aukera gehiago puntuak batzeko.

Irekia dago txarraren alderditik. Izan ere, bi taldeak atzealdean dira sailkapenean, eta orain arteko jardunean, puntu gutxi batzeko gai izan dira: bost dauzka Athleticek, lau Osasunak. Biak daude jaitsierako lekuan.

Zalantzak uxatu zituen Osasunak joan zen igandean irabazita, baina segida eman behar dio ordukoari, gaur galtzeak mamuak haizatuko dituelako berriz. Athletic okerrago dago, oso bolada txarrean, eta gaur ez irabaztea zer ekar dezakeen zaila da asmatzea.

Horri lotuta dago zelaitik kanpokoarena. Osasunak galtzen badu, ez da gauza handirik gertatuko, zalantzak agertzeaz haratago. Baina Athletic bada galtzailea, ikusi egin beharko da nolako jarrera hartzen duen zaleak, pazientzia galtzeko ez baitzaio asko faltako, emaitza txarrengatik, eta taldearen inguruko kontu ilunengatik (filtrazioarena, kasu). Galtzaile izanda, zuzendaritzak zer egin dezakeen ere hizpide da bazterretan.

Arriskuaren derbia izenda daiteke gaurkoa. Galtzailerik bada, eta hori etxekoa bada, batez ere.

Bi taldeen deialdia gaurko