Denboraldiaren kopia
ATHLETIC 2
MALLORCA 1
Athleticek 1. mailan jarraitzeko urrats erabakigarria eman du. Ia partida osoan jokalari bat gehiagoz aritu arren, asko sufritu behar izan du hainbat unetan.
- Hitz egin dezatela matematikek. Lortu al du Athleticek datorren denboraldian 1. mailan jarraitzeko aukera? 38 puntu zituen eta gaurko 3kin, 41 dauzka. Lasai egoteko moduan da mundu guztia.
- Aurkaria Mallorca zela ikusita, azken sailkatua, irabazteak lasaitasuna ematen zion Athletici; ez irabazteak, kezka areagotzea. Bien egoeragatik edo auskalo zergatik, berezi samarra atera da neurketa. Tira, Athleticen kasuan, denboraldian gertatu zaizkion hainbat gauza gertatu zaizkio gaur ere, eta alde horretatik, sasoi osoa definitu dezakeen partida izan da gaurkoa.
- Azkar sartu du gola Athleticek. Adurizek 7. minutuan. Ondo hastea esaten zaio horri. Hasiera biribiltzeko aukera ederra alferrik galdu du, ordea, geroxeago. 26. minutuan, Adurizi geratu egin dio penalti jaurtiketa. Horra denboraldian hainbatetan gertatuaren kopia bat: golak sartzeko aukera garbiak alferrik galtzea. Jokaldi horretan, Mallorca jokalari bat gutxiagorekin geratu du, Fontasi bigarren txartel horia atera baitio epaileak.
- Ematen zuen lan handienak eginak zeuzkala Athleticek: irabazten markagailuan, jokalari bat gehiago… Baina sasoi honetan emantzat jotzen ziren hainbat emaitza zeharo okertu zaizkio taldeari, eta gaur gutxi falta izan zaio horretarako.
- Mallorca ez da ezkutatu egoera okerraren aurrean. Irabazi beste aukerarik ez zuen, eta presio altua egiten hasi da. Arriskuak hartzen. Ez zaio gaizki ere atera, estutu egin duelako Athletic zenbait unetan. Baina Athleticek ere izan ditu Mallorca estutzeko egoerak. Kontuak kontu, emaitza ez da aldatu gehiago, eta 1-0ekoa izan da atsedenaldiko emaitza.
- Bigarren zatia hasi orduko bigarren gola sartu du Athleticek, Ander Herreraren bidez, baina epaileak ez dio baliorik eman, Adurizek pasea eman dionean baloia zelaitik kanpo zegoela adieraziz.
- Mallorcak joko zuzena erabili du Athletici min emateko, eta lortu du hainbat egoeratan. Lehenengo baloia ia beti kanpotarren batek irabazten zuen, eta Athleticeko atzelarien eta Iraizozen artean zalantza sortu izan da batzuetan. Athleticek berriz, eskuin hegala baliatu du Mallorcaren areara gerturatzeko, behin eta berriz. Baina ezin gauzatu golean. Bielsak Llorente atera du Adurizen ordez, eta lan txukuna egin du aurrelariak.
- Bigarren gola berak sartu du. 79. minutuan izan da. Eskuin hegaletik Susaetak egin du jokaldia, eta Llorentek ondo bukatu du. Ez du ospatu aurrelariak. Pozak gutxi iraun du, ordea, San Mamesen. Bi minutu geroago, Giovannik dotore eman dio baloiari falta batean. 2-1. Eta hamar minutu pasa aurretik.
- Orduan ibili da estu Athletic. Mallorcak asko estutu du faltetan eta kornerretan, denboraldi osoan zehar talde guztiek Athletici egin diotena eginez. Baina ez da gai izan beste gol bat sartzeko, eta horrelaxe bukatu dira gaurko kontuak (Mallorcak bederatzi jokalariz jokatu ditu azkeneko 3 minutuak, Ximori bigarren txartel horia atera baitio epaileak).
- Joan da partida hau, eta joatear da denboraldia ere. Gaur ere, sasoi osoan bezala, asko kostatu zaio Athletici bere eredua ezartzea, eta alde horretatik ere izan da denboraldiaren kopia gaurkoa. Orain, gertatua patxadaz aztertu eta erabakiak hartzen hasteko garaia heldu da.