Cahill eta Drogba: batek irabazitakoa besteari falta, eta alderantziz
ASIA KOPA ETA AFRIKA KOPA
Australiako kapitainak garaipen handia lortu du selekzioarekin Asia Kopa irabaziz; Boli Kostako aurrelariak etxetik ikusi behar izan du selekzioak berarekin inoiz irabazi gabea irabazten: Afrika Kopa. Aldiz, kluben arteko lehiaketetan, Drogbak dena dauka irabazia; Cahillek lorpen handirik ez.
Tim Cahillek Sidneyn (Australia) ikusi zuen mundua aurreneko aldiz. 1979ko abenduaren 6a zen. Ordurako, urtebete eta bederatzi hilabete zeuzkan Didier Drogbak. Abidjanen (Boli Kosta) jaio zen 1978ko martxoaren 11n.
Biek daukate lanbide dira, biak dira futbolariak. Ofizioaren langintzan, herrialdean hasi zen Cahill; etxetik urrun, Drogba, Frantzian. Partidei partidak gehituz, Ingalaterran gurutzatu ziren aurreneko aldiz. Hantxe jokatu zuten lehenbizikoz elkarren aurka. Cahill Evertonek fitxatu zuen 2004n, aurretik Millwallen aritu eta gero (1998-2004). Drogba Chelseak eraman zuen 2004 hartan, Marseillatik.
Biak aurrelariak, biak golaren bilatzaile ase ezinak. Jokatuko zituzten makina bat partida elkarren aurka Ingalaterrako lehiaketetan, eta horien artean, bat nabarmendu behar da: 2009ko FA Cupeko finala. Chelseak irabazi zion Evertoni (2-1), eta Drogbak sartu zuen bere taldearen aurreneko gola.
Beste garaikur bat Afrikako jokalari onenetako batentzat. Ez zuen aurrenekoa, eta ezta azkenekoa ere. Aurretik, Chelsearekin orduan ere, bi Premier League irabazia zegoen jarraian (2004-2005 eta 2005-2006), eta FA Cupeko txapeldun izana zen 2006-2007 sasoian. Baita beste lehiaketa batzuk ere. Baina 2011-2012an lortu zuen ordura arteko garaipenik handiena: Txapeldunen Liga.
Hamar urte lehenago, Cahillek Ingalaterrako Bigarren Mailako titulua irabazi zuen Millwallekin. Evertonekin ez zuen alerik lortu. 2012ra arte egon zen Liverpooleko taldean. Drogbak ere 2012an utzi zuen Chelsea.
Txina aldera jo zuen afrikarrak, Shanghai Shenhua taldera. AEBn jarraitu zuen ibilbidea australiarrak: New York Red Bulls taldean. Txinako taldeak ere egin du bien arteko bigarren lotura, FA Cupeko final hark bere garaian egin zuen bezala; izan ere, Cahill oraintxe fitxatu du Shanghai Shenhuak.
Biak uztartzeko hirugarren bidea selekzioarekin izandako lorpenak eta lorpena ezak dira. Kluben lehiaketetan ez bezala, Drogbak ez du ezer irabazi Boli Kostarekin. Ezta Afrika Kopa bat bera ere, askotan faborito nagusi bezala aritu izan bada ere. Cahillek berriki lortu du sari potoloa Australiarekin: Asia Kopa irabazi du aurrenekoz. Boli Kostak egun gutxira lortu du Afrika Kopa, baina Drogba gabe.
Bien arteko loturekin segituz, sariei dagokionez, batek duena besteari falta zaio, eta alderantziz.
