Bufoiarena
EUROKOPA 2012
Suediak irabaziz esan dio agur txapelketari, eta Frantzia bigarren postuan sailkatu da final-laurdenetarako (2-0).
- Frantziak aukera zeukan final-laurdenetako aurkaria aukeratzeko. Espainia edo Italia. Aukeratu duen edo ez, Espainiaren kontra jokatu beharko du. Ezustean, Suediaren aurka galdu eta gero (2-0). Denen iseka eta burla eragin du bere jardunak. Gaur gaueko bufoia izan da.
- Zalantzak laga ditu oilarraren selekzioak txapelketak. Bai, baina ez; ez, baina bai. Gaurkoak ezkorrenak are gehiago itzaliko zituen.
- Behin dudaren mundu desatsegin horretan murgilduta, bat nagusitzen da ororen gainetik: nola moldatzen da erosoen Laurent Blancen taldea? Ematen du kontraerasoa duela lagunik onena… baina ematen zuen. Baloiaren jabe denean ez da eroso aritzen. Baina jokalariak badauzka ondo jarduteko. Bakoitza bere aldetik ez ote doan, taldearen kaltetan. Zalantzak zalantza, aurkari arriskutsua da. Zerbait gordetzen ari dela ematen du.
- Suedia pozik joango da, kaleratuta pozik joatea baldin badago, behintzat. Irabaziz esan dio agur txapelketari. Ibrahimovicek egundoko gola sartu du, boleakada zitala bezain ederra gauzatuz (54. min.). Hortik aurrera, defentsan jardun, eta kontraerasoa baliatzen saiatu. Bigarren gola Sebastian Larssonek egin du (89. minutuan). Akordatuko dira suediarrak Ingalaterraren aurka irabazten joan arren, galdu egin zutela. Baina sasoian sasoikoak bakarrik balio du futbolean.