Boxeolari onenak bezala
REALA 4
MALAGA 2
Lehen zatiko hamar minututan hiru gol sartu eta lehia bere aldera erabaki du Realak aurkari zuzen baten aurka.
- Gutxi izaten dira boxeolari izarrak. Tarteka-tarteka azaltzen dira halakoak, oso noizbehinka. Borroka sonatuak irabazitakoak dira, beste boxeolari handi batzuen aurka. Borroka historikoetako protagonistak dira… garaile izan direlako. Kirolaren munduan ezagunak dira halako hainbat izen. Irabazle petoak: k.o bidez edo aurkaria lehertuz borroka luzeetan.
- Realak bere egin du borroka lekua. Bera da izarra. Jotzaile zehatza bilakatu da. Ez du hutsik egiten aurkariari kolpea tiratzen dionean. Boxeolari bikain haien pare dabil. Borroka luzeak izan edo k.o moldekoak, beti garaile da. Gaur, Malagari, beste boxeolari on bati, hiru kolpe zehatz eman dizkio hamar minututan, eta hantxe amaitu da borroka.
- Lehen zatiko 21. minututik 30.erako tartean jaso ditu zartakoak Malagak Anoetan: Velak, De la Bellak eta Griezmmanek eman diote aurpegi bete-betean. Lurrera erori da, altxa ezinda, baina lotsarenak egiteko borondatea azaldu du, eta luzatu egin du borroka. Baina hamar minutu horietan erabaki da lehia. Zaleek bazekiten, ikusleek bazekiten.
- Borrokaren hasierak, ordea, ez zuen ematen hamar minututan erabakiko zenik jokoan zegoen guztia. Malaga hasi da lehian nagusitzen, baloiaren jabe eginda. Baina minik ez dio eman Realari, ez dio kolperik tira. Gero, Reala hasi da baloiaren lagun egiten, baina Malagarenak egin ditu, kolpeak gorde… hamar minutu horiek heldu diren arte.
- Hortik aurrerakoan, bizpahiru kontu, atsedenaldia bitartean: Malagak gola egin du, Moralesek, eta Zurutuzak min hartu du; Pardo ordezkatu du. Atsedenaldia, eta 3-1 Reala nagusi.
- Bigarren ekitaldian, azkar eman dio beste kolpe mingarria etxeko taldeak kanpokoari: Iñigo Martinezek buruz aurpegia odoletan utzi dio berriz Malagari. Lehengo irudipen eta uste bera: erabakita lehia, lehen ez bazegoen behintzat.
- Gero, Malagak bigarren gola egin du, Santa Cruzen bidez, baina ikusi beharrekoak ikusita zeuden. Hiru puntu gozo batu ditu Realak aurkari zuzenaren aurka, eta lauko aldea du bere alde, bien arteko averagea ere bai. Txapeldunen Ligan borrokatzeko bidean da Reala boxeolari handia.