Bihotza eta burua
Athleticek oso gertu dauka Europako Ligako finala, eta horretarako, gaur Sporting Lisboa eta joaneko emaitza (2-1) gainditu beharko ditu San Mamesen (21:05).
- Athletic-Sporting Lisboa. Finalerdia Europako Ligakoa. Tituluan ez naiz oso originala izan. Zenbat bider aipatzen ote dugu bihotzarena eta buruarena futbolean, eta kirol guztietan. Gaur beste behin. Topikotzat ere har daiteke, baina gaueko partidari bueltak ematen ari naizela, ezinbestekotzat jotzen dut buruarena eta bihotzarena.
- Bihotza: indarra, motibazioa, final handia oso gertu ikustearen sentsazio deskribatzen zail hori, zaleak, oihuak, animoak, aurkaria paretik kentzeko gosea… eta beste ezaugarri asko. Eta gaurko egun berezi honetan, Euskal Herriaren historian iltzatuta dagoen Gernika ezin ahaztu. Erabiliko al du hiri bonbardatuaren aipamena Marcelo Bielsak partidaren aurreko hitzalditxoan?
- Burua: bihotzari neurria jartzea neurria jarri behar zaion momentuetan. Futboleko ezaugarriekin lotuta ikusten dut burua:
- Erritmoa noiz azkartu, noiz bizitu konturatzea eta egitea.
- Erasoan, mugimenduak oso garbi edukitzea egin aurretik, eta egiterakoan, argi egitea.
- Opari gutxi egitea. Batere ez egitea ezinezkoa delako.
- Sportingen kontraerasoa moztea. Edo askoz hobe, baliabide hori gauzatzeko aukerarik ez ematea. Nahiz eta,bat edo beste egitea ezin saihetsi.
- Sportingen kontraerasoa dagoenean, oso garbi eta argi edukitzea zer egin behar duten jokalari guztiek defentsako lanean. Horretan (ere), Bielsak esango zien, eta esango die zer egin behar duten.
- Taktikoki, onena litzateke Sportingen jokalari azkarrak (goikoak, alegia), atzean sartzea defendatzen, kontraerasoa saihesteko modu egokiena litzateke. Horretarako, baloiaren jabe egin, eta zelaia zabaldu eta sakon jokatu behar dute Bielsarenek. Sportingen zelaian jokatzen bada partida, finaletik gertu izango da Athletic.
- Partida luzea izan daitekeela barneratuta izatea. Kanporaketa edozein unetan gainditu daiteke, eta edozein une horien barruan azken minutua ere badago. Presarik ez, alegia.
- Geldikako jokaldiak erasoan eta defentsan.
- Sporting saiatuko da, akaso, partidako erritmoa geratzen. Hori egiteko bide asko daude, eta bat da araudiaren mugaraino gerturatzea. Hala gertatzen bada, Athleticekoek ezin dute burua galdu. Pazientzia eta autokontrola.
- Aste honetako beste partidei begiratu beharra dago. Bartzelonaz eta Real Madrilez ari naiz. Batetik, etxean jokatzearen abantaila ez dute baliatu. Bestetik, eta Bartzelonaren jokoa gogoan, badu antzik Athleticenarekin; honetan, batez ere: beti berdin jokatzen dute biek. Bartzelonari kalte egin zion baliabide ezberdinak ez izatea. Athleticek ez dezala pairatu gabezia bera.
- Horrekin lotuta, Bielsaren esaldi batean jarriko dut arreta. Eta argia: “Futbolean, irabazlea izaten da alternatibak aurkitzen dituena”. Burua, azken batean.