Bigarren final-laurdena, gaur: Alemania-Grezia
EUROKOPA 2012
Gdansken jokatuko dute (20:45, Cuatro).
- Final-laurdenetako lau partiden artean, erakargarria ez den bakarra da gaurkoa. Alemania, txapelketako sendoena, eta Grezia, ahulenetakoa (sailkatu arren).
- Galdera zaila dago erantzuteko, oso zaila: zer egin behar du Alemaniak bere burua Eurokopatik botatzeko? Hasi erantzunak botatzen, eta nekez osatuko dugu erantzun osorik. Ia ezinezkoa da gaur Alemaniak galtzea, ezusteari tartea beti utzi behar bazaio ere.
- Kutsu politiko eta ekonomikoa eman nahian ari dira partidari hainbat lekutan. Greziarrak aparteko motibazioa edukiko omen dute, final-laurdena zure herrialdearekin jokatzea motibatzeko helduleku txikia balitz bezala. Gainera, Greziako jokalarien ezaugarri onenetakoa horixe da, motibazioa, grina eta gogoa soberan dituztela.
- Partidaren bilakaera taktikoaz, hitz gutxi: Grezia atzean sartuta aterako da, kontraerasoa eta joko zuzena erasoko lagun dituela. Alemaniak izango du baloiaren jabetza, eta Greziakoen horma parez pare duenean asmatu beharko du, pase zehatzak tarte txikian ematen, zelaia zabalduz eta sakon jokatuz, barrutik eta kanpotik. Baloia galtzen duenean ere estutu egin beharko luke Greziaren irteera. Hala ere, lerroak atzeratzea ez da aukera txarra, baldin eta greziarrak ekimena hartzeko badaude; kontraerasoa ezaugarri zitala du Alemaniak.
- Bilakaera balizko bat da goikoa. Beste bat izan dezake gero. Baina bat edo bestea atera, Alemaniak ditu giltzak finalerdietako ate guztiak irekitzeko. Greziak zabaltzen badu atea, futbolaren historian izan den ezuste handienen pare legoke.