Zaila omen etxetik kanpo irabaztea. Beste taldeei ere kosta egiten ei zaie. Halaxe mintzatu zen atzo Philippe Montanier, Realeko entrenatzailea.

Galderei erantzunak ematerakoan izan zen, eta galderek izaten dute zergati, arrazoi edo eragile bat atzetik. Realaren kasuan nabarmena da: euri asko egin du azkenekoz etxetik kanpo partida bat irabazi zuenetik. Joan zen denboraldian izan zen, Valentziaren zelaian.

Gaur, beste aukera bat izango du taldeak hiru puntuak etxera ekartzeko. Betisen zelaian ariko da (22:00). Montanier ez dabil oker traza horietako galderei erantzun halakoak ematen, egia baita beti izan dela ‘errazagoa’ etxean irabaztea. Baina kanpora begirako justifikazioak barrura begirako eskakizun izan behar dute. Eskatu egin behar zaio taldeari. Eskatu egin behar zaio oldarkorragoa izateko, eraginkortasuna azaltzeko, aukera duenean aurkaria txikitzeko. Ez dadin berriz gerta Levanteren zelaian jazotakoa duela hamabost egun.

Irabaziz gero, gora begira jarriko litzateke Reala. Partida oro da motibagarri berez, baina honek aparteko beste hori ere badu. Antzeman dadila zelaian.

Realaren jokalari zerrenda